季內曾勝馬會盃 灰獸精神威同各位拜拜了！

時屆季尾，好多馬都開始退役，今日就有6匹之多，最受注目當然是羅富全7捷灰馬「精神威」除名，此匹6歲馬是現時羅廐第3高分馬，之前評分更曾扳到115分，亦曾在季內贏出G2馬會盃，總獎金超逾1200萬，馬主養到呢匹好馬，真係好好運，希望佢退役後有美好生活喇。

韋達馬房則有兩匹「協進神駒」及「快意」退役，余家的「協進神駒」一路受傷患影響，跑咗20次都未入勝門，月頭更驗出右前腿懸韌帶受傷，最後黯然引退；至於「快意」則是4戰不勝自購馬，3月跑傷腳後一直都未能上陣，到今日亦隨廐友一同除名。

另外高伯新馬房3捷8歲拍賣馬「快利寶」，何廐17分處女馬「全中」以及蔡約翰剛戰跑第9的三零部隊37分馬「時時奪綵」，都齊齊加入退役行列。