東網電視
更多新聞短片
或者如果莫雷拉當年考試冇肥佬，可以去日本長期發展，情況就有所唔同。
就算呢幾日有巴度受傷要缺陣一段時間、4場香港國際賽獲選馬匹公布同埋潘頓打破韋達谷草累積頭馬最多紀錄嘅新聞，都唔夠莫雷拉為日本隊復出參加香港國際賽，然後又突然放棄公司騎師牌照嘅消息夠震撼性。如果某政府想搵人幫手冚走晒自己嘅負面新聞，搵雷神幫手就最啱，事關佢每次爆出嚟嘅料都夠晒noise同震撼，絕對估佢唔到。
由上季尾仲同潘頓鬥餐死爭冠軍，結果埋單都有132場頭馬，相隔半年竟然就講退休，甚至想喺自己掛靴前去世界唔同地方策騎，搞番個巡迴告別，筆者真係睇唔透莫雷拉呢一刻諗緊乜。只係佢最近嘅種種舉動，的確一直好支持佢嘅香港賽馬會相當無面咁遮。
毫無疑問，莫雷拉對香港馬圈嘅貢獻係巨大，呢樣嘢馬會CEO應家柏亦曾多次提及，筆者亦非常同意，雷神來港發展，的確令香港騎師水準提升至另一個水平，亦公平啲講，如果唔係有雷神，潘頓能否去到依家呢個高度，亦係未知之數，佢兩個嘅互相競爭的確令各自騎技都有所提升，其他騎師唔想被淘汰，都係不斷進步，大家有目共睹。
但另一方面，香港馬圈亦令莫雷拉嘅國際地位提升唔少，唔係話佢當年雄霸新加坡無人識，但香港的確亦令佢走向國際舞台嘅地方，正正因為佢係香港呼風喚雨，贏盡唔少大賽，先令佢有機會去日本客串，又試過去澳洲跑大賽，亦試過夥拍香港同日本佳駟揚威杜拜，以上種種都係香港馬圈畀佢，甚至今次佢髖骨受傷，都係得到馬會全力協助治療，依家佢嘅突然告別，甚至決定騎日本馬倒戈挑戰主隊角逐國際賽，呢啲舉動都令筆者有點無話可說。
其實當莫雷拉突然話要返回巴西養傷，筆者甚至好多人都估佢未必會再返回香港策騎，事實上佢今次返去巴西後，的確係咩都消息都冇，但一有消息竟然唔係話佢幾時返香港，而係佢已經接受日本方面邀請，策騎東瀛佳駟出戰國際賽，據知連馬會CEO應家柏都係要睇報道先知雷神消息，就知佢喺呢段時間似乎冇同馬會聯絡，都唔好話一眾支持佢咁耐嘅香港練馬師，亦唔知佢近況，依家佢一句退休，算唔算玩起馬會，大家心中有數，所以神即係神，佢諗嘅嘢，唔係我哋凡人可以知道
■山無陵
