國際賽同區議會選舉撞期 12月全部谷戰跑9場

馬會繼早前公布咗賽期表同埋評分變動後，今日(周四)亦公布咗新馬季9月至12月嘅賽事編排，當中最多人關心就係究竟香港國際賽是否與2023年區議會選舉撞期，都係喺12月10號舉行呢？根據馬會嘅賽程編排，今年香港國際賽依然於12月10號上演，當日舉行10場賽事，除咗4場香港國際賽，1場二班賽，3場三班賽同埋兩場四班賽事。

至於今年浪琴國際騎師錦標賽則於12月6號上演，4關騎師賽同上季一樣，分別於三班谷草1200米、三班谷草1650米、四班谷草1000米同埋四班谷草1650米舉行，當晚亦會安排9場賽事。另外，新馬季12月除咗浪琴國際騎師錦標賽夜，其餘3次谷草夜賽都安排跑9場賽事，而喺12月24號平安夜，就會越洋轉播於日本舉行的有馬紀念賽日。