【香港一哩錦標】金鎗六十第3次捧國際賽 馬主喜極而泣！

是日國際賽4場重頭戲之一，第7場香港一哩錦標1600米G1，日本隊5駒圍攻，而本地代表唔止有後起之秀「永遠美麗」、「安遇」等應戰，服役破盡紀錄的本地3屆馬王「金鎗六十」，亦都久休7個多月養足精力復出。

此匹25勝超級良駒今次臨場再成為2.3倍大熱，但由於14檔關係，已較往時稍「冷落」，不過劣檔歸劣檔，「金鎗六十」質素實在太超，今次沿途頂在3疊中間位，仍然無阻其凌厲後勁，彎位已見在何澤堯胯下湧上勢頭甚佳，到直路一騎，完全彈甩晒對手冇得鬥，結果壓下亞軍上年香港打吡冠軍31倍馬「遨遊氣泡」及季軍日本代表「匯兩川」，全場掌聲雷動！

過完終點，見到馬主陳家樑感觸落淚，場面非常感人，可能賽前承受鉅大壓力，如今終於得到釋懷呀。而「金鎗六十」呢場勝仗，亦追平前馬王「好爸爸」3勝香港一哩錦標紀錄，今次亦為馬主贏多近1,800萬獎金，生涯累積獎金逾1.6億，真係勁到一個點！

贏完騎師賽再贏國際賽的何澤堯，呢個禮拜確是大豐收，賽後Win神話「金鎗六十」可以喺今日第3次贏香港一哩錦標，感覺非常特別，簡直不能相信！雖然今場抽得14檔起步，但自己對馬匹有信心，陣上攞到一個有利位置，跟住「野田小子」跑，而「金鎗六十」陣上唔搶口，走勢放鬆，當時已知自己有機會取勝，入直路後提一提隻馬都交出好強後勁贏馬。雖然大家都話「金鎗六十」已經8歲，但自己對「金鎗六十」從來都冇疑問，呂廐馬房團隊居功至偉，佢哋保養得隻馬好好。何澤堯預計，「金鎗六十」今季應該會跑埋董事盃同冠軍一哩賽。

而呂健威就話「金鎗六十」成功3度取勝香港一哩錦標，心情當然放輕鬆不少，其實賽前14檔都有啲擔心，不過今仗證明咗佢嘅冠軍本色，發揮馬王應有嘅水準，而今季尚餘目標，應該會跑多兩三場，下一仗目標就會係董事盃。

至於8歲老馬今場出色表現，會唔會下季繼續服役，仲要視乎馬匹往後嘅表現，不過今場亦見到馬匹雖然抖咗一輪，但仲係好享受賽事，因應佢嘅能力，當然會再作考慮。

第7場賽果：1-10-13-5

二重彩賽果：1-10(最後賠率56)