【馬匹加分】神虎龍駒狂加21分對上一匹係佢！

尋日伍鵬志終於中止兩期無進帳嘅局面，憑「神虎龍駒」順利贏馬之餘，兼且攞到從練首場三級賽頭馬，固然開心，佢亦提到係夢想成真。不過，伍鵬志賽後都話預計「神虎龍駒」賽後會被大幅加分，咁今日馬會公布馬匹評分變動，結果真係一如呢位練者所料，「神虎龍駒」真係被重手加分，由90分加至111分，即係狂加21分，呢場G3頭馬嘅代價真係唔細。

其實「神虎龍駒」今次畀重手加分，只要係因為本身已經蝕咗20分上陣，加埋艾兆禮又超一磅，結果就被加21分。咁對上一匹被重手加21分嘅馬，大家又記唔記得呢？就係蔡約翰馬房嘅短途好手「天下為攻」，此駒當日以107分捧走G1主席短途獎後，正正被加21分至128分，可惜之後未能再添頭馬。

另外，「浪漫勇士」於22年以102分勇奪女皇盃後，則被重手加20分至122分，其後此駒增添不少佳績，目前評分達132分。