東網電視
更多新聞短片
「確好勁」(中)早前試田草1600米閘率先衝線。
季初一度陷入低潮嘅黎昭昇，目前在10場頭馬喺手，總算站穩，但自從喺上月中憑「領航財子」爆冷後，黎廐亦連續4次賽事無進帳，嚟到周日沙田賽事，練者派4駒出擊，除咗上仗初出即跑第3名嘅「金風萬里」，角逐尾場三班田草1600米嘅初出馬「確好勁」亦要留神。
4歲德國自購馬「確好勁」來港前跑咗7場，先後喺德國、意大利及法國上陣，曾於1600米G2德國堅尼取得季軍，來港前最後一仗喺法國跑G3戴芙莉錦標，僅以頸位之微不敵目前在港服役嘅「齋月」，後駒評90分插班，而「確好勁」就評80分，今次只面對三班對手，係咪應該有啲水位？
當然，歐洲馬普遍需要多啲時間適應，黎昭昇都曾提過「確好勁」來港初期進度比較慢，但最近試咗課田草1600米閘率先衝線，表現漸漸上力，今次初出跑三班1600米，睇吓能否畀到驚喜？
