東網電視
更多新聞短片
1/2
每年都聽到有人評論打吡賽事水準唔高，甚至可以用低水準形容。打吡其實係一班正值升軌嘅4歲精兵惡鬥，睇吓現階段邊匹馬進度來得及時。「遨遊氣泡」2023年克服不利14檔中段變奏爆46倍W贏打吡，當時有唔少人都話水準唔係高，兩年後嘅「遨遊氣泡」試過遠征，今季仲贏埋三冠系列頭兩關賽事，冇人話佢唔堅啦掛！贏到打吡固然係唔少馬主心願之一，但強如「美麗傳承」當年同樣失落打吡，可見以打吡來判斷一匹賽駒成就實屬言之過早。
今屆打吡各駒實力平均，檔位必然影響賽駒陣上發揮。幕後為求賽駒發揮出水準均起用外援，幾位騎師再來港上陣，當日其他賽事自然手執不少好馬，其中莫雷拉第6場坐騎「八仟財陞」上場轉彎突然跪一跪，莫雷拉同此駒夾過一次，今回應有不同。
