功夫茶:淥狗飛龜冇人性 袖手旁觀有報應

2021年04月09日 00:04
東網電視
更多新聞短片
「狗是唯一愛你甚過於你愛自己的生物」。之不過,本港嘅虐狗事件層出不窮,冷血變態,令人齒冷!日前元朗又驚現虐狗狂徒,兩日前一名劉姓男子報案,指其飼養嘅母狗及狗女,背及頸部受傷紅腫,相信曾遭毒手施虐。
經初步調查,兩唐狗傷勢異常,其中8歲狗女背部傷口甩皮潰爛,受傷面積頗大,而11歲母狗近頸部傷口潰爛,更發現烏蠅幼蟲,初步估計已受傷4至5日,相信係畀冷血狂徒淋滾水灼傷!愛協職員將兩隻唐狗帶走治理,而警方則把案件列為「殘酷對待動物」,交元朗警區刑事調查隊跟進。功夫茶希望警方認真調查,早日將冷血虐狗狂徒緝拿歸案!畀佢逍遙法外,係對「萬物之靈」嘅最大侮辱!
呢,幾日前西環僑發大廈對開,又發生「飛龜事件」,有市民行行吓街,突然聽到「嘭」一聲巨響,赫然見一龜倒伏路中,龜殼爆裂奄奄一息!警員到場調查並登樓找尋龜主,不排除係意外墮樓。阿哥,連同今次意外,一個月內至少發生4宗空中飛龜,情況令人憂慮。咁講喇,你養得佢就好比養BB,點都要有啲防範措施及危機意識,有啲窿窿罅罅嘅地台或氣窗之類,總要加啲圍欄或鐵絲網圍住啩?都話善待動物唔會使人類少一塊肉,可惜,人類嘅愚行往往對動物鑄成無可挽回嘅大錯!
講起「飛龜事件」,剛過去嘅復活節及清明假期,大埔碗窰路嘅溪澗出現大批放生龜,關注組織直指,同一位置有多達40隻背部寫有放生者姓名嘅烏龜,當中唔少已經死亡!呢,義工即使盡力拯救,也無從堵截善信繼續放生。有堪輿學家表示,如放生導致動物受傷或死亡,等同殺生,積福不成反折福!各位「善長仁翁」,他日放生,能不慎乎?仲要唔該用吓腦,放生龜通常人工飼養,冇野外求生能力,難以生存之餘,更有機會染病而傳染至原生物種,造成生態危機!本報關心動物權益,對去年律政司放生深井掟動物落街狂徒引致「破窗效應」已大加鞭撻;此外,漁護署帶頭虐牛更加口誅筆伐,而棘線傷猴,本報倡裝膠板,市民激讚,漁護署只換上易斷裂普通鐵線,終極良方應採納本報貼心設計!庸官無能又不虛心受教,鐵板一塊,睇見都忟!
有道是一個對動物殘忍嘅人,也會變得對人類殘忍。咪話功夫茶唔提醒,冷血虐待動物冇人性,整整吓習慣成自然,連自己仔女都唔放過,虐待埋一份,屆時就真係喊都無謂!本報用盡心思為廢官獻上「貓狗善終園藍圖」,議員市民皆稱善,一片苦心,可惜廢官怠政,情願做「高薪廢物」,未經認真思考就一口拒絕,根本無心善待動物,一眾庸官冇好生之德,麻木不仁,肯定遲早都會有報應!