「基」情澎拜　黃溢濠林耀聲咀足30Take

組合PlayTime成員黃溢濠（濠B）和林耀聲，於經理人麥曦茵執導的電影《曖昧不明關係研究學會》中「肌」情四射，酒吧激吻！濠B自爆於片中錫盡男女：「除咗同好多女仔有接吻鏡頭之外，最大嘅突破係同男生有接吻。」說到於酒吧激吻戲分，阿聲大呼：「我哋咀咗超過30個Take！因為錫落去太大衝力個人彈返轉頭！」二人異口同聲表示：「開頭好尷尬，錫錫吓咪豁出去囉。」初嘗與同性接吻的濠B和阿聲直言愈拍愈起勁，更不小心把嘴唇滑進對方口內！

有突破性演出的阿聲直言是自薦演此角：「因為想挑戰吓自己做演員嘅底線可以去到邊。」更自爆為片中一幕性感出浴鏡頭下過不少苦工：「拍之前兩個月不停淨係食白烚雞蛋、雞柳同菜。嗰時都練咗六舊腹肌！」戲中情傾好兄弟濠B，不過阿聲笑言現實中的女友不介意他與同性咀嘴：「佢覺得好搞笑！話好想睇！」

複雜關係

除激吻外，二人亦於片中上演同性曖昧戲碼，濠B更在情人節為阿聲剪頭髮！不過濠B自爆角色內心複雜，與阿聲激咀之餘，他既是王敏奕（Venus）的「兵」又是媾女王：「得唔到Venus先媾女，有向佢表白，好心痛。」濠B和阿聲又興奮稱此片本來只於香港夏日國際電影節播映兩場，近日再加推一場，令二人深感激咀和操肌都是值得！