Magic Gals獨創魔法舞台闖Sing途

組合Magic Gals剛出戰樂壇就不甘平凡，以「Music x Dance x Magic」作為主打概念，為舞台加入魔術元素，誓要創造出獨一無二的魔法舞台！三女早在出道前已涉足不同的演藝範疇，雖然起步較遲，但不怕與青春無敵的偶像組合對撼，對星途充滿信心！

新進組合Magic Gals由新城電台節目《恐怖熱線》的兩位DJ楊穎妍（Icy）和盧婉婷（Allen）加上劉芷盈（Mizer）組成，組合的出現源於Icy在一次魔術比賽中認識Mizer，對音樂和魔術都有着無限的熱誠的三人一見如故，以「Music x Dance x Magic」為主打的Magic Gals從此誕生。

27歲轉型唔怕遲

在歌手路上展開新一步的三人破格地將音樂、舞蹈和魔術三合一呈現舞台，她們說：「依家嘅樂壇風格有好多都好相似，好希望有新嘅氣象，以往都比較少人會喺音樂加插魔術元素，所以我哋就想試吓。喺舞台上要一心幾用其實都有危險性，而且唔可以用有過程嘅魔術，如果唔係就會好易穿煲，實踐嘅時候先發現，原來擺得最多時間嘅係諗點放魔術入表演入面。」

三人的平均年齡已27歲，由做Model入行到開咪做DJ再轉型做歌手，會否覺得浪費了時間以致太遲入行？三人坦言當初亦有過年齡的憂慮，但多得公司同事的鼓勵：「佢哋話年齡同唱歌冇關係，仲舉咗個例子，阿Kay（謝安琪）都係27 歲先入行，所以我哋依家好正面，覺得反而係以前嘅經歷令我哋更加明白呢行，識得點去待人接物，更重要係識得點樣更好咁Present自己。」

Magic Gals坐言起行努力提升各方面的技能，希望能夠更上一層樓，成為多元發展的藝人：「過去嘅經驗令我哋依家唔使好似新人咁Warm Up，而且對依家嘅工作都有幫助，好似做Model時學點擺Pose，對跳舞都有好大幫助。」

初登銀幕「蒲」到嘔

Icy和Mizer其實早已客串過《喜愛夜蒲3》初現大銀幕，Icy自爆當時「蒲」到嘔！Mizer解釋因為在Club內連續拍攝15小時太暗：「當時個場景又黑又暗，我哋一直拍咗15個鐘，Icy無啦啦話好想嘔，之後就嘔咗。」兩人笑言這個經歷絕對不是甚麼「趣事」，卻是難能可貴的小經驗。