玄神歸位　鍾偉強重奪梁朝偉金曲出碟

歌手鍾偉強（Simon）回歸樂壇，為首張唱片及新歌《朦朧夜雨裡》舉行發布會，同場播放新歌MV，獲得愛女、公司老闆林建名、太極的鄧建明、雷有輝、劉賢德、陳細潔（Abbie）、范振鋒、師妹樂隊Choco等撐場。

太極和Simon互笠高帽，太極更即場邀請Simon擔任他們五月的演唱會嘉賓。老闆送上黑膠唱盤給Simon，寓意其黑膠唱片大賣，而經理人戴夢夢和范振鋒則送上黑膠唱盤造型的蛋糕，樂隊Choco則送上耳機。

Simon透露新碟有三首歌是自己作曲，亦有翻唱當年寫給梁朝偉的《朦朧夜雨裡》：「今次特登用咗三個月時間加咗段英文獨白喺呢隻歌度，編曲亦有啲修改。」他又自爆其實歌曲是為當年女朋友而寫的：「我哋分開咗，但仲掛住佢，等咗三十幾年終於可以自己唱番呢首歌，所以想表達番內心世界，向佢表白，所以就特登加咗段英文獨白表白。（段表白講咩？）講仲好掛住佢，無論佢去到幾遠都仲喺我心裏面，走唔甩，始終年輕嘅愛情係比較純真，分開咗都會掛住對方。（依家同佢仲有冇聯絡？）有呀，仲係好朋友。（唔怕老婆呷醋？）唔怕，幾十年冇見仲要驚？我有冇咁大魅力？不過佢都知我寫呢隻歌嘅，年青輕冇乜本事所以先憑歌寄意，送隻歌畀佢表達自己內心世界。佢今日都有嚟，多謝佢支持。」

偉仔錄音Simon心酸

問可會想跟偉仔一齊合作？他渴望有此機會，並表示當年偉仔錄音時自己亦在場：「雖然佢藝員出身，但都好用心錄咗好耐。不過其實佢錄嗰陣我都好心酸，因為自己係歌手，但都冇得唱番自己作品，不過依家三十幾年後終於可以唱番。」談到Abbie神秘現身，問Abbie是否其當年的女友？Simon則笑說：「你哋自己諗，唔講喇！」

陳細潔同Simon係老朋友

問Abbie之前可有聽過這首歌？她表示之前只聽過梅艷芳演繹的版本，今日是第一次聽Simon版本。問這首歌是否送給她？Abbie尷尬笑說：「搞錯呀？（首歌係送畀佢之前已經分手嘅女友？）我哋係舊朋友。（你哋有冇拍過拖？）梗係冇，成班朋友都好鍾意音樂，Simon無論做邊行都對音樂不離不棄，好感動，無論佢做咩都唔會忘記音樂，所以我哋成班朋友都好支持佢。（知唔知女主角係邊個？）唔好講係邊個啦！」問是否認識？她口窒窒說：「我…我識嘅，（係咪自己呀？）梗係唔係我啦，我冇資格。（前女友係咪今日有嚟？）佢好似走咗啦！」