東網電視
更多新聞短片
馬德鐘真係天生一副「Key圖相」，一直被惡搞，Key乜似乜！
1/11
「萬能鍾」原來唔止係鍾志光專屬，有馬神之稱嘅馬德鐘亦成為新一個「萬能鐘」。近日因為無綫劇《以和為貴》熱播，網民們再次惡搞男主角馬德鐘！有網民忍唔住高呼「上帝能否創作一張Key不到馬德鐘的圖？」，望住啲「有聲圖」，真係佩服一班咁有創意嘅網民！
「自我介紹」馬德鐘
觸發網民創作神經嘅就係喺《以和為貴》入面，馬德鐘化身調解員導師，指住白板講書嘅一幕，令到網民忍唔住爆咗！佢哋Cap低咗呢一幕，令馬德鐘再次成為萬能Key！而呢輯新嘅改圖，命名做「認住馬德鐘」系列，而創意字句就有「認住馬德鐘，清潔好輕鬆」、「因住馬德鐘，累你小相公」，真係笑到反肚！另外仲有其他網民發揮小宇宙，揮筆疾寫以下創意字句，包括：「見到馬德鐘，一定好輕鬆」、「其實馬德鐘，唔用金寶鐘」、「 掛住馬德鐘，冇咗個老公」、「見到馬德鐘，坐車去金鐘」，睇完真係要因住笑到有腹肌咯！
2007年已被惡搞
今次改圖成功令馬德鐘被推上討論區熱門關鍵詞，有網民更翻Loop以往馬神嘅改圖作品。其實，馬德鐘早喺2007年已經被惡搞，當中最令人回味嘅，莫過於佢喺2006年尾嘅劇集《爭霸》中，因為造型太似上帝耶穌，而被Key上「哈利路呀！」字幕。仲有網民曾經將人稱「燦神」嘅廖偉雄，換成馬德鐘嘅五官，估唔到效果一樣咁fit。
不過講開又講，咁啱得咁橋嘅係，曾經合作《洪武三十二》同《以和為貴》嘅馬德鐘同徐子珊，竟然不約而同成為網民惡搞熱門心水，究竟係整定，還是真係咁啱，真係不得而知？不過其實被惡搞都唔係壞事嚟，最主要都係想大家有得笑吓，開心吓啫！
網民有話兒：
Jun xxx：真係笑死
Elise xxx：d（啲）圖有聲ga（嘅）
Cat xxx：笑到喊……萬能key
Caffxxx Ng：笑到塊mask裂咗
Jeffxxx Li：見到馬德鐘， 一定好輕鬆
白板上字句，再加埋字幕「認住馬德鐘，清潔好輕鬆」，真係無得頂！
唔好認錯！馬德鐘（左）變身《向世界出發》嘅「燦神」廖偉雄。
馬德鐘喺《洪武三十二》入面被Key上「不如一鞭打死我」。
《洪武三十二》改圖，再嚟多個！
「因住馬德鐘，累你小相公」加麻雀，真係笑到有腹肌！
發哥（左）同馬德鐘，個神情相似度有成99.9％。
《洪武三十二》劇中變身比卡超入面嘅小智：「出嚟啦！」
馬德鐘喺《爭霸》中，因造型太似耶穌，被Key上「哈利路呀！」字幕。
發哥喺《喋血雙雄》入面嘅金句「不如一槍打死我」。
嘩！仲有後續o添！
