王敏明設靈　區偉麟：太太唔舒服照演出

前無綫藝人王敏明日前因淋巴癌逝世，下午假紅磡世界殯儀館設靈，喪禮以基督教儀式進行，並於翌日出殯。圈中藝人包括王祖藍與太太李亞男亦有送上花牌。

王敏明的丈夫區偉麟於喪禮上被問到心情可有平伏些？他說：「依家心情好好多，因為有信仰，之前兩星期極度唔捨得，一直不間斷咁一齊，好多生活上嘅點滴，知佢去咗個好靚嘅地方，今日放鬆咗，由拍拖到結婚差唔多三十年。（骨灰點安排？）安排緊安葬喺華人永遠墳場，要等，睇下殯儀館可唔可以幫我哋安排到，等火葬後安排。聽講嗰個係個家庭位，可以放四個人嘅骨灰，我自己都有個安位，到返天家時唔需要後人操勞，會同太太一齊。（仲有無唔捨得？）一路都唔捨得，同佢相愛咁多年，已經融為一體，正如聖經所講分唔開，佢鍥而不捨咁去見證，傳福音，我會延續佢傳福音之路。佢好錫我，想我哋開心啲，佢唱歌跳舞，好享受喺舞台。過年時佢唔舒服，之前接咗show佢想推，但大會指定要佢表演，藉着主耶穌嘅力量佢完成咗，以後我喺舞台演出我心都有佢。」