娛樂專題：「翻版Baby」溫心情傾梁朝偉

時下「女神」的定義十分極端，不論陳妍希、鄭欣宜還是夏蕙姨，統統被冠上女神光環。但被稱為「校花」卻不同，校花永遠是巴打心中最Pure的真女神。而深圳校花溫心亦同樣令人眼前一亮！

溫心這名字對大家來說可能比較陌生，來自深圳的她因外表有點像Angelababy及台灣女星李毓芬，在深圳大學讀書時被封為「最甜美校花」。作為校花，在學校少不免成為巴打的夢中情人、絲打的公敵，而她亦直言在學生時期已電暈不少男同學：「還好啦！我似校草多啲，唔知點解畀呢個稱呼我。（多男仔追？）都OK嘅，其實都係『校花』呢個稱號先會令我有機會入行。」

注定入娛樂圈

擁有天使面孔，已贏在起跑線上，就算入行很曲折，也是注定食這行飯。她說：「讀書時有學跳舞，老師覺得我有天分叫我去考吓，咁好彩考到兩個專業，其中一個係北京表演，但我當時唔係咁想入呢行，反而想做老師。」後來始終難敵命運安排：「我依家嘅老闆喺網上發現咗一張我嘅相，但張相唔係我本人上載嘅，可能係唔知邊個女仔扮我放上網，點知老闆真係喺全國大海撈針搵到嗰個女仔，個女仔畀人篤穿咗係假扮之後，就講番話相入面個女仔其實叫溫心，喺深圳，老闆就喺深圳搵到我。」

入行後拍過幾部電影，擔過大旗做女主角，但最為人深刻的卻是傳出介入黃曉明與Angelababy的戀情，被拍得與曉明出席飯局，她說：「同曉明大哥嘅緋聞都過咗好耐，都係自己太為食，同好多人食咗餐飯，點知就變成咁，佢個人幾Nice。（追你？）冇，大家合作先識，係朋友，自己都好崇拜佢。」

毅然來港闖蕩

頂着「最甜美校花」的名堂，溫心毅然來港發展，初嚟報到自然需要適應香港娛樂圈，她坦言中港大不同：「我覺得香港同內地接受嘅嘢唔太一樣，好似拍劇咁，喺內地佢哋會要求我去做唔同嘅嘢，可能要演同我本身反差好大嘅嘢，反而香港可能要求自我本色。依家我最想拍動作片同喜劇，最想同梁朝偉合作，覺得佢戲好，相信喺佢身上會學到好多嘢！」

為食少女無懼是非

演而優則唱的溫心聯同李元玲及許雅婷等組成「少女標本」，齊齊殺入香港樂壇，但女子組合多傳是非，溫心直言不怕：「唔會多是非嘅，其實我哋都比較夾，組成組合都係因為比較嘈、又鍾意食嘢，好多共同嗜好，唔會爭嘢，反而擺多啲精力落音樂度。」

要成功在港突圍，行性感路線未嘗不是一條捷徑，她說：「依家行少女清純路線為主，之後唔排除會行性感路線，睇吓日後嘅發展啦！」