網民熱話：周筆暢唱廣東歌技驚四座

《超級女聲》出身嘅內地歌手周筆暢，昨晚喺慈善節目上與曾參與《中國好聲音》嘅陳樂基，合唱出陳奕迅歌曲《大開眼戒》，網友都驚嘆來自北京嘅周筆暢能唱出一口流利廣東話，而動人嘅聲線亦令人聽得津津有味。有網民隨即開Post話「周筆暢啲廣東話幾得吓」，又大讚佢唱功深厚，更誇口話佢K.O.晒節目上所有歌手！

事實上，周筆暢出生於中國廣東省，所以識講廣東話毫不出奇。而一直喺北京發展嘅佢，主要唱普通話歌為主，但亦不時喺公開場合演唱廣東話歌，如前年於深圳演唱會上唱出經典金曲《少女的祈禱》。當時，已經有唔少網民大讚佢唱廣東話比普通話歌更為出色。可能係廣東話始終係周筆暢嘅母語，因此往往能夠唱出真摰感覺，演繹得更為動人！

其實，周筆暢曾推出過廣東話歌《花樽與花》，並誠邀著名作詞人林夕填詞，但後來先發現自己廣東話已大有退步：「錄這首歌的時候才發現，我怎麼不會說粵語了？粵語歌很難唱，我在北京呆久了。」自此，周筆暢就甚少再推出廣東話歌！網友都希望佢快啲練番好母語，甚至嚟香港發展，讓香港歌迷一飽耳福！

周筆暢於2005年《超級女聲》一唱成名，但被同屆嘅歌手李宇春打敗，屈居亞軍。正當冠軍李宇春及季軍張靚穎，紅到踏上國際舞台時，反而周筆暢卻一直喺內地默默耕耘，雖然多次拎過國內嘅最佳女歌手獎，直到去年再爬上《我是歌手2》舞台。不過，長江後浪推前浪，當時周筆暢嘅人氣就被初轉戰內地嘅香港「小巨肺」鄧紫棋（G.E.M.）超越，有唔少人都戥極具實力嘅周筆暢相當唔抵！

網民有話兒：

pspxxxer：支持周筆暢出廣東碟

Cxx1：粵語歌唱得好好喎，不如黎（嚟）香港發展粵語歌幫下（吓）手啦。

asdxxxoi：周筆暢係（喺）深圳長大的，能講流利廣東話，佢本身係有廣東歌的，"花樽與花"，"不唱"

maxxxnc：筆筆人靚聲甜，粵語又準，快出粵語碟！

吃xxx人：少女的祈禱那裡（裏）幾秒停頓​​，哇靠，心都碎了。 。 。