網民熱話：泰臣一個玩晒《大時代》

20150615
  • 東網電視
    更多新聞短片
    點搞呀？泰臣一個已經演晒咁多個角色，仲要扮邊個似邊個！
    無綫劇集《大時代》喺深宵播出引起城中熱話，唔少人都捱眼瞓睇重播，不過開心嘅時光過得特別快，因為《大時代》已經播映完畢，今晚輪到周星馳嘅《他來自江湖》接棒啦！
    你以為《大時代》熱潮就咁完咗？出名扮嘢好叻嘅泰臣，就好有誠意咁重拍咗《大時代》主題曲《歲月無情》嘅MV，除咗改名做《大揪時代》，仲將自己個名改埋做「泰大揪」，淨係呢啲名，已經笑到肚痛！
    而喺MV入面，佢唔止親自唱埋主題曲，仲一人飾演十幾個角色，除咗主角方進新、方展博、慳妹、方婷、丁蟹等等，仲扮埋配角劉江、羅樂林呢啲甘草演員，真係扮乜似乜，完全笑到唔停！
    喺MV入面，泰臣除咗扮鄭少秋官仔骨骨咁喺岸邊唱歌之外，仲重演番劇中唔少經典場口。就好似一開頭丁蟹（鄭少秋）跳樓唔成嘅片段、又唔怕大吉利是扮埋方家車頭相，仲有不得不提就係佢扮埋方進新（劉松仁）傻咗之後拎住件衫嘅一幕，真係好神似！
    而泰臣扮女主角仲吸睛！佢扮玲姐（藍潔瑛）怒打丁蟹，打得入型入格，就連慳妹（周慧敏）死喺方展博（劉青雲）懷中，都一一跟足。不過就有唔少眼利嘅網民話呢個慳妹有鬚根，雖然美感就無乜，但搞笑成分就攞晒分喇！
    網友有話兒：
    Wah XXXwaiXXX：泰臣版歲月無情很好笑！
    XXXXX ng：期待多d（啲）節目啦！
    BXXny LXX：非常精彩，非常細緻
    我XX：勁好笑！
    yeeXXXlo：誠意之作。