網民熱話：黎明勁過K-pop　一早識玩電音

近年嚟，有啲人會覺得「香港樂壇已死」，唔及舊歌好聽，加上韓流風靡全亞洲，K-pop音樂大行其道，好多後生細仔都轉為追捧韓國靚仔Oppa！但同時令到一班唔太好K-pop嘅80、90後嘅網民開始懷念「四大天王」時代嘅香港樂壇，仲激讚當中有「金句王」之稱嘅黎明（Leon），仲話佢喺成個90年代一路紅到尾，啲歌好聽之餘個Look又煞食！

網民仲舉出多首當年Leon嘅金曲，好似《眼睛想旅行》、《聽身體唱歌》、《全日愛》、《夏日傾情》、《我的親愛》、《送你一瓣的雪花》、《情深說話未曾講》等等，真係聽到個歌名都忍唔住哼幾句！除咗呢啲爆紅嘅歌，網民仲話Leon有好多冇Plug嘅歌都好正，又推薦咗《雜念》、《全憑直覺》、《提提我》等歌曲。原來有唔少歌迷都鍾意聽Leon嘅Disco電音快歌，仲話呢啲曲風正正係依家嘅K-pop Style，大讚Leon早人哋十幾年已經玩電音玩到出神入化，首首歌編曲仲喺當年走在潮流尖端o添！除咗首歌，網民都話Leon嘅mv都係超越時代，依家睇番都完全唔Out！不過有人講笑話Leon點解要唱咁多快歌，但次次唱Live都係企定定？

講完歌，梗係講樣啦！網友就話Leon後生時書生型嘅Image深入民心，甚至靚仔過好多依家嘅韓星，仲話韓國娛樂公司應該喺訓練習生同搞形象方面參考過香港明星，好似依家啲Oppa開始「攝衫」又分界咁，同Leon當年嘅Style一模一樣！

網民有話兒：

食得嫁xx：《Sugar in the Marmalade》呢隻碟依家仲不時有聽！

虎王步xx：《藍色街燈》個mv靚仔到癲！

wyxx：細細個就覺得佢好靚仔！

宋子x：我記得Leon去過外國出席活動，啲外國女明星都狂望佢！

面包超人xx：識貨！我細個都成日學佢着白色t-shirt，仲梳佢個頭！