陳柏宇肉緊攬實蔡穎恩　女友呷醋撒嬌

歌手陳柏宇（Jason）日前邀得好友蔡穎恩以女主角身份（Evelyn）為新歌《別來無恙》拍攝MV，拍攝當日他們十分入戲，其中一幕穿上婚紗的Evelyn跟Jason在鏡頭前肉緊攬攬，而鏡頭後感情要好的兩人就不停講笑，Jason更不時特地講歪廣東話搞gag，氹得Evelyn哈哈大笑。

受訪時Jason講到今次是破例主動找Evelyn擔任MV女主角，他更謂期待跟Evelyn合作MV起碼達年半以上，但可惜之前都夾不到期，故今次兩人能首次合作MV都感十分開心。而談到MV沒有親熱鏡頭，只有吵架場面，Jason直言吵架反而難拍，更笑言：「因為冇對白同埋唔收音，所以我哋講埋啲嘢其實係極度無聊，有一幕我真係忍唔到笑，我話『依家唔係我唔想買呀，但《天線得得B》真係冇出好耐啦嘛！』」此時Evelyn即笑言：「但嗰個shot仲要係佢take我喊喎，我真係勁難忍，即刻NG，全場即爆笑！」而問到如果要拍親熱鏡頭女友符曉薇會呷醋嗎？Jason坦言：「佢會架，會撒下嬌，然後話『等我又去試番鋪先！』但如果佢拍我真係介意架，做咩啫依家，唔拍唔得咩？會死咩？除非大家都係非常超級專業嘅演員，但我自問做唔到。」

而Evelyn則謂跟圈外男友講過今次拍MV會被人鬧到喊：「跟住男朋友就話『如果佢真係好惡咁鬧你，我幫你出番頭！』，我就話都係做嘢啫。（你好冧？）呢啲說話都係要講嘅。」至於講到Evelyn在今次MV中穿婚紗，問到之前為工作已披過兩次婚紗的她可會加快想結婚的念頭？對此她坦言：「想結婚同真係要結婚係好大分別，想就幾乎個個女仔都會想，但到真係要面對結婚要考慮嘅嘢就好多，例如對方係咪真係適合去到終老嘅一個人？」而定於2017年結婚的Jason就笑言：「我已經諗完呢啲問題架啦！我已經覺得佢適合架啦！（求咗婚未？）未，仲諗緊，我又唔想求其做，第一佢想件事難忘，佢成日同我講『你求得唔好我唔嫁畀你』，但我就話唔信你唔嫁畀我，不過我都會攞晒所有誠意出嚟去做呢件事。」