娛樂專題：陳家樂迷途知返繼續追夢
20150727
東網電視
更多新聞短片
經炒單車受重傷一役，陳家樂表示明白珍惜身邊人的重要。
陳家樂入行八年一直未有機會參與大型電影製作，去年終有上位機會，與知名台星彭于晏及韓星崔始源合作，齊齊做單車手飾演要角，可惜經過大半年的艱苦訓練後，在第一場戲就意外受傷，導致鎖骨斷裂，一度面臨換角危機，而家樂更因受傷一度成為傳媒焦點，感覺備受重視，最後他終憑堅持重返劇組：「呢份喜悅，比起當初話我係主角更有價值。」
英皇藝人陳家樂入行八年，早於求學階段已偕同學過戲癮，拍片重演經典電影《無間道》，更直認一定要演主角。分享短片後，就被指有當幕前的意向，他說：「啲人誤會咗做幕前一定係唱歌，當時我個女朋友就靜靜雞幫我報名參加新秀，但其實我唔係好識唱歌，雖然最後都有去比賽，不過去到十六強就輸咗，公司依然想同我合作，但我又想做又唔想做，掙扎咗幾年，最後喺我二十歲嘅時候簽約。」
受傷險遭換角——傷心
陳家樂於2014年接拍林超賢執導的電影《破風》，擔任單車選手主演之一，是首次接觸大型電影的機會，能隨團隊走訪世界各地取景，更可與彭于晏、崔始源及竇驍等各方演員同場較技，對家樂的星途來說可謂重大突破！
家樂為電影做足準備，接受約半年的艱苦訓練，惟努力險付諸東流，在拍攝第一日因拍攝踩單車場面而炒車嚴重受傷，左邊鎖骨斷裂，致一時無法繼續拍攝，他說：「呢個係一個好大嘅經歷，之前從來都冇諗過做任何嘢會受傷、會有生命危險，所以好多時都好搏親身上陣，我記得有部戲要我碌落嚟，我直情係好開心，有得玩就不如自己碌，連替身都冇。」
因受傷而面臨被Out的他當時懊惱不已：「收到換角消息，傷心咗一晚，諗咗一晚，到第二日我打畀監製同佢講：『如果我踩唔到單車，你換角，我明白，但希望你畀個機會我，我覺得自己可以踩。』」之後他自拍一段踩單車的片段以示堅持，亦憑着這一份堅持和任性，劇組最後容許他再次入組：「呢份喜悅，比起當初話我係主角更有價值。」
感到家人關愛——珍惜
經此一役，家樂了解到演員的自我守則，發現自己稍有閃失也會帶來重大影響：「我以前唔會諗呢啲，冇安全意識，但今次發現原來你唔保護自己，會令安排好晒嘅所有工作都會冇晒，呢個經歷話我聽要保護自己。」不過，他慶幸因受傷而感受到身邊人的關心，學懂珍惜：「到咗某個年紀，我好少同屋企人傾偈，覺得佢哋唔明我嘅工作，又驚解釋工作嘅時候佢哋唔明，我又會忟，但又驚佢哋擔心，令到大家保持距離唔去溝通，但今次呢件事後我明白要溝通，多啲時間陪佢哋，起碼畀佢哋知道我做緊乜，我知佢哋其實真係擔心！」
冇收入冇信心難捱
家樂自小有表演天分，當過童星：「人生第一個作品係四、五歲左右，當時拍廣告，首廣告歌我好記得，『糖又得，甜又得，味道真好，凍又得，熱又得，咑咑咑咑』，唔係我唱，但係個廣告有我。」
雖然有天分，但他長大後真正入行成為藝人後，才明白作為一個演員應有的要求，一套由他擔正的電影《很想和你在一起》令他自我批判：「嗰段係我最想放棄唔做藝人嘅時間，拍完之後對自己成個演藝生涯都好冇信心，想放棄唔再做。因為嗰時有信心危機，加上唔了解劇本，我做咗個角色出嚟係同個劇本唔啱嘅，我自己睇完覺得好唔舒服。」
多得伯樂——導演麥曦茵
其後家樂面臨幾年鮮有工作機會的階段，讓他反覆思考究竟是否因自己在《很》片中表現太差的關係，甚至打算退出娛圈：「冇收入非常難捱，但係又覺得自己一個興趣、夢想唔想咁易放棄。（家人？）就係因為佢哋冇說話畀我，令到我更加自責，又冇表露到好擔心，我反問自己：『點解我咁大個仔都冇能力照顧好屋企人呢？』仲要搞到佢哋驚我唔開心而唔去同我傾。」直到他遇上一位導演–麥曦茵，是她改變家樂否定自己的想法。
「我唔鍾意個劇本，唔認同個角色，我嘅行為、演嘅對白、感情，就會話畀人聽我就係唔鍾意呢個角色，好明顯話畀人聽我唔相信，連我自己睇番都覺得係錯！」但在麥曦茵的眼中，家樂是一個很坦誠、直接、能將內心情感表露無遺的演員，她更告訴他一個作為演員的天命，使他學懂相信導演，找一個方法將角色化成自己認同的人，賦予它一個「做」的理由。
麥曦茵並不是單純與家樂分享一套「演員哲學」，她同時為他帶來演出機會，在英皇電影《DIVA華麗之後》飾演要角，經過曦茵的鼓勵後，家樂演戲的心態徹底改變，耐心與曦茵溝通和揣摩角色，並把《DIVA》視為自己告別娛圈之作瞓身演出：「我唔知之後仲會唔會拍戲，希望盡力做好《DIVA》個角色，但係拍完之後，我又覺得自己真係好鍾意演戲，重燃愛火！」
遇上天使——鍾舒漫
家樂對演戲重燃愛火，惟此燒紅的火燄未有將其演藝事業推上高峰，他再次因力不從心而陷迷茫，慶幸他此時遇上一位天使–鍾舒漫！她在一個慶祝酒會上，向孤獨坐在一旁、默默隔岸觀火分享他人快樂的家樂伸出援手：「佢問我想喺呢一行發展到咩位置？我話我淨係想大家認識陳家樂係一個演員，而唔係某某公司嘅小朋友，想有自己一個名字，大家諗起演員就會諗起陳家樂，佢話：『咁即係想人識你？即係你想要獎項？我幫你祈禱！』」
豈料祈禱即時奏效，家樂翌日獲邀飾演電影《當C遇上G7》第一男主角：「雖然唔係大製作，但令我更加相信自己係一個演員，亦都喺呢套戲入面搵到我做戲上面嘅突破，尤其係感情戲，亦都認識咗一啲新朋友，令到我對製作更有興趣。」
談情停一停諗一諗
談到感情事，家樂說：「拍過三、四次拖，有一個拍咗三年，有一個拍咗十年。」這段十年情至今已告一段落，問到分手原因？他直認在感情路上仍需摸索：「唔知自己想點，我驚影響咗人，所以唔想拖住個女仔咁耐，想停一停。其實呢十年我好多謝佢，因為佢係好無條件咁為我付出，喺我咩都冇、咩都唔識嘅時候就喺我身邊，我哋一齊去成長，去到中間我想放棄嘅時候，佢都好支持我，到我決定繼續，佢亦好支持我，其實佢好似我屋企人咁喺我身邊。但最後，我諗成長去到某一個位嘅時候，可能你會知道同嗰個人未必係愛情。」
想靠「奸」計——突圍
現時的家樂暫時將愛情擱在一旁，先向事業出發，趁「搏殺」階段建立事業基礎：「2015年係我嘅衝刺年，喺參與電影製作，甚至上年拍劇，工作比以前多咗好多。（演員目標？）其實我幾想做奸角，就係因為我唔襯，好多人都覺得我唔啱做，令到我更加想去做，因為愈係唔顯眼嘅奸角就愈好睇。我入行咁多年着足八年校服，每一年我都許願今年唔要着校服，要着都要着制服！警察又好，消防又好，救護都好，點都要着制服！」年屆廿九歲的家樂天生一張娃娃臉，但早於多年前，他已希望為「小朋友」的外形畫上句號，無論在工作上、家庭上甚或感情上，都向成熟之路邁步向前。
後記：傷者不等於弱者
家樂的傷勢其實至今仍未完全康復，雖然事隔大半年後，他已能再做運動，但運動力仍不復當時，更會因感到痛楚而「就住就住」。不過，家樂從不埋怨半句，因為他不希望再被人以「傷者」看待，正如他對自己個人印象的執着，他在訪問中曾說：「我淨係想大家認識陳家樂係一個演員，而唔係某某公司嘅一個小朋友，想有自己一個名字。」家樂絕對不希望自己成為弱者，內心充滿對「實力」的渴望。