網民熱話：撐林夏薇做一線花旦

近年唔少一線花旦完約後都決意向外闖，搞到要無綫面臨花旦荒！不過大家定啲嚟，因為最近以光速上緊位嘅小花有陳凱琳、蔡思貝、劉佩玥等等，又唔使驚睇嚟睇去都係嗰幾個女主角嘅！

之但係，有見最近陳凱琳主演嘅電視劇《張保仔》，引發大批劣評，其實佢都係個廿四歲新冒起嘅姐仔，進步空間仲有好大，又唔使踩到咁盡嘅！網民於是提出建議，開咗個名為「林夏薇有冇機會做一線花旦？」嘅Post，仲惹來熱烈討論，回覆足足有成16頁咁多，當中評論正反參半！

唔少網民都撐薇薇演技突飛猛進，仲話佢嘅氣質係女主角型，平時形象又夠晒健康同低調，為咗唔想畀人覺得佢靠「林峯個堂妹」個朵出名，佢非常努力令人記得佢叫「林夏薇」。薇薇第一部拍嘅《結‧分＠謊情式》雖然唔係做女一，但戲份好多，注意度好高，而且佢嘅戲劇演出比較內斂，啱做硬朗型嘅角色，有人仲讚佢喺《收規華》入面做得好似仲搶眼過女主角楊怡添！

不過亦有人提出佢結咗婚，泊咗個好碼頭，應該會減產淡出，不過亦有人覺得只要薇薇熱愛做戲，就算結咗婚都唔會影響佢對做戲嘅熱誠，仲話佢依家嫁咗頭好人家更有本錢追求演藝事業上嘅滿足！再加上，其實已婚女藝人大有人在，就好似視后田蕊妮咁。不過留意番，阿田同老公杜汶澤未有生小朋友嘅打算，而且阿澤又係圈中人，對另一半工作非常了解，令阿田可以盡情喺事業上搏殺。

網民有話兒

HoiYuXXXX：我都對佢另眼相看，佢《收規華》入面啲戲有好大進步，又有女主相！佢屬於「良家婦女」feel，好有機會上位，唔同胡定欣，雖然定欣有演技，有好多網民支持，但係演「壞女人」演得太深入民心，係「二奶命」！

CheungCCxxxxxx：一家（定）得啦，佢好努力，本身表演系畢業演技已經有，再加上一個夠爆嘅角色必定出位。

JasonXXX：越（愈）演越（愈）好，睇得出佢好用心演戲，結咗婚又如何？田蕊妮都結咗啦！

TommyXX：佢演時裝劇係一個「硬傷」，可能就係因為呢個「硬傷」被定位了。

Mon10xx：有機會，靚女又有演技。至於有冇機會將來拎視后，就要睇佢keep唔keep到水準喇！

「東網巨星」fb專頁：

每日Keep住推介最「精」最「趣」娛聞，只需數分鐘，即可化身娛樂通，茶餘飯後唔驚冇話題。想加入熱議最hit最爆娛聞行列？呢個專頁真係不Like不可。