梅艷芳遺物二度拍賣 內衣褲底價$100

20151211
東網電視
更多新聞短片
梅艷芳遺物繼2013年被拍賣後,近日遺產管理人滙豐信託在網上舉行拍賣會,拍賣阿梅逾3,000件遺物。

梅艷芳於2003年12月30因子宮頸癌病逝,走畢40年的精彩人生,其璀璨的舞台歲月令人無限懷念!但隨着阿梅的離開,其遺產不斷引起風波,其故居的逾400件遺物於2013年被拍賣,轉眼兩年,近日遺產管理人滙豐信託在網上舉行《LAST BUT NOT LEAST-最後芳華》拍賣會,阿梅的逾3,000件遺物再被拍賣,包括最具價值的新秀冠軍獎座及金像獎最佳女配角獎座等,還有她的日常用品如高跟鞋、毛公仔及梳化,底價由100至10,000元不等,而阿梅的貼身內衣褲竟以底價100元拍賣,本月30日便是阿梅逝世12周年,卻於此時被拍賣內衣,令人萬般感慨!

「傷害全世界梅艷芳嘅歌迷同朋友嘅心」

阿梅生前對幾位徒弟都關懷備至!徒弟譚耀文得聞師傅遺物被拍賣後,在微博怒轟,誓要捍衞阿梅尊嚴。他接受《東網》電話訪問時表示心如刀割:「我真係好心痛!已經喺微博表示我嘅不滿,作為梅艷芳徒弟、朋友同所有歌迷,都唔願見到咁嘅情況,點解要用拍賣形式,我知可能最終會落喺歌迷手上,但經過咁嘅競投、拍賣,係一種侮辱,絕對係一種侮辱!」說到激動之處,他泣不成聲,哽咽說:「侮辱咗一個為香港付出咁多嘅巨星、影后、歌后,你用百幾二百元底價拍賣佢啲私人嘢,即使賣到十億都係一種侮辱!」

譚耀文希望即時停止拍賣,有關單位及歌迷會合力解決事件:「傷害咗全世界梅艷芳嘅歌迷及朋友嘅心,點解要咁做?」他表示如果有人性的話,信託公司可用另一種方式轉讓,例如歌迷會用文字或合約去見證代收遺物,放在一個有紀念性的地方供人欣賞:「點解信託公司唔可以做呢樣嘢?點解唔可以做呢樣嘢?」他甚至提出為信託公司籌錢:「如果信託基金唔夠錢運作,我可以叫所有徒弟、朋友、生前老友去做慈善演唱會籌款囉!」阿梅另一徒弟何韻詩則不作回應,而徒弟組合草蜢至截稿前仍未有回覆。

梅媽乜都唔知

阿梅年屆92歲高齡的母親覃美金,早年曾多次打官司爭取女兒遺物,她表示對今次拍賣遺物毫不知情。她接受《東網》電話訪問,一聽到內衣也拍賣即冷笑道:「聽歌迷講十幾廿蚊一條吖嘛!好抵死!(想買番啲遺物?)我都唔識電腦,加上我都冇錢喺手。」她指此舉徹底羞辱阿梅,並炮轟信託公司:「內衣都拎出去拍賣,好侮辱,好肉酸!(信託公司事前有聯絡你?)邊有呀?拎出去賣都同我講?」提到兩年前阿梅的遺物曾被拍賣,梅媽表示當時有名熱心歌迷為她拍賣了一張枱:「個熱心歌迷知我想要番張枱,當時佢就買咗送番畀我,依家仲放喺屋企,嗰個歌迷今次話想買兩個獎送畀我添!」

至於信託公司在2013年拍賣會上聲稱遺失新秀冠軍獎座,如今獎座被拍賣,信託公司方面接受《東網》訪問時沒有正面回應:「獎座係包括喺遺物裏面,而今次嘅角色只係遺產管理人。」事隔兩年再進行拍賣,信託公司指今次是最後一次。

《東網巨星》App獨家率先播映《巨星放題》,若想先睹為快收看即將推出的第十集最終回、第一時間知曉誰是「放題IQ王」,
請下載《東網巨星》App。
最強娛樂APP「東網巨星」下載連結:
安裝「東網巨星」APP
http://on.cc/redirect/entertainment
安裝「東網」APP
http://on.cc/redirect/oncc