《刀下留人》不留人　網民勁Like

尋晚無綫劇集《刀下留人》播出第24集，聽晚就大結局喇！網民開咗好幾個post，話要推呢套劇推到播完為止，因乜解究鍾意彈多過讚嘅網民都極力追捧呢？之唔係因為《刀》劇題材新鮮，劇情仲好破格添！

網民激讚《刀》劇

睇得電視劇多嘅觀眾都應該知，主角要死嗰陣通常都有人衝出嚟救佢，點知就喺尋晚嗰集，女主角花蕊紅（邵美琪飾）竟然畀自己嘅愛人兼劇集男主角葉常綠（黃德斌飾）親自操刀斬首身亡！

呢一刀簡直斬到入網友個心入面，齊齊高呼要封《刀》正式成為神劇咁話喎！網民即刻諗起之前花蕊紅話過自己好想死，仲問葉常綠用咩方法自殺最好，當時葉常綠提議佢服毒，仲話幫佢補多刀，佢話：「我講過，當你需要我嘅時候，我會喺你身邊。」完完全全喺斬首呢一幕兌現出嚟，情境係好悲慘，同時又揪心又浪漫又淒美，真係呃咗唔少擁有一顆少女心嘅觀眾成公升眼淚呀！加上套劇喺黃金時段播自然多人睇，有網民就話：「當時我喺屋企成家人，個個都笑笑口等緊刀下留人嗰陣，點知真係斬咗落去，全屋靜咗兩秒！」

花蕊紅臨死前講咩？

有網民仲研究花蕊紅被斬首之前講咗句嘢，令葉常綠恨下心咁一刀斬落去，究竟呢句嘢講乜呢，到依家都仲係一個謎，有人話係「命中注定」、都有人搞gag咁話係「未做完呀！」、「劈準啲！」、「咪傻豬啦！」、「I'll be back」等，真係創意無限呀，希望大結局前會解開謎底啦！

有人亦總結咗《刀》劇嘅各大看點，包括題材有驚喜、劇情夠晒懸疑同張力、對白恰到好處又有深度、選角出色之餘二線戲份更加為《刀》錦上添花！呢套劇畀人講到咁神，究竟有幾好睇，大家真係要把握呢兩日，?實最後兩集喇！

網民有話兒

醒少少XX：劇本真係寫得好好，睇到我眼濕濕，後尾忍唔住喊咗！

我最XX：大家有冇Cap邵美琪臨死講嗰句嘢嘅gif，佢究竟講乜？我好想知！

下一站XX：我唔服呀，明明套嘢叫刀下留人，真係斬咗落去，點解會咁，個劇名呃人嘅！

胡X：仲以為會好老土咁，有人會衝出嚟大嗌「刀下留人」！

孖寶XXX：我喺茶記食緊飯仲大大聲咁講話「實唔會斬啦！」結果斬咗，即刻Feel到自己面都紅埋，樣衰到想搵窿捐！

最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。如果鍾意韓風嘅，集中介紹最新韓劇、韓片同韓國最新歌曲嘅《韓劇榜》，同埋Highlight每周韓星訪港精彩片段，以及報道韓國演藝圈最新動態嘅《韓風吹》絕對啱晒你。仲諗咩呀！快啲Download啦！

最強娛樂APP「東網巨星」下載連結：

http://on.cc/redirect/entertainment