網民熱話：《西遊記》之張衞健型到跌渣

賀歲片《西遊記之孫悟空三打白骨精》卡士強勁，由天王郭富城飾演孫悟空、羅仲謙做沙僧、馮紹峰做唐三藏，仲有內地演員小沈陽飾演豬八戒，配搭非常新鮮！雖然城城喺《西遊記之大鬧天宮》入面扮過牛魔王，不過做孫悟空就真係第一次，網民都話好期待城城嘅演出！講起《西遊記》，其實近20年嚟做過唔少版本，好似前年喺無綫播出、由徐錦江扮沙僧嘅內地版就負評多多，所以要數最經典，網民就一致話演過兩次孫悟空、又創出唔少金句嘅張衞健喇！

就好似1996年無綫劇《西遊記》，做到出神入化嘅張衞健時不時都講「Yo！使乜驚呀！」同「我係花果山水濂洞美猴王齊天大聖孫悟空」，真係掉轉都識背！而四師徒中，江華做嘅唐三藏、黎耀祥扮嘅豬八戒同麥長青做嘅沙僧一樣令人留下深刻印象，網民話一向演技好嘅江華真心扮乜似乜，將唐三藏嗰種慈悲為懷嘅性格做到入型入格，又話視帝黎耀祥雖然憑「柴九」彈起，不過喺網民心目中，佢最經典嘅角色始終係豬八戒！

去到2002年，張衞健再喺《齊天大聖孫悟空》中做孫悟空，但唔止冇令人反感，網民仲非常之Like！尤其是首主題曲段Rap「我攀得高時看得遠　天算地算不如我心算」，真係見字有聲！張衞健仲愈做愈調皮，加上佢嘅搞笑口頭禪，好似「型到跌渣」、「噼啪你個隆的咚呀」，仲有嗰句長到爆Seed嘅「我係如來佛祖觀音菩薩指定取西經嘅特派使者花果山水簾洞美猴王齊天大聖孫悟空」，真係過咗廿年都仲記得點背呀！雖然《西遊記》有唔少版本，就好似1998年《西遊記（貳）》，無綫換咗陳浩民做孫悟空，但始終味道差少少咁咯！

網民有話兒：

Loxx Mxx Cxxxg：江華真心好犀利，做乜似乜，做唐僧可以做到果（嗰）種慈悲為懷入型入格

Cxxxdy_txxg：張衞健個（嗰）套連首歌都好聽過人，歌詞好有志氣，聽到人嘖嘖讚好。

Rixxy Woxx：簡直係無敵陣容，仲有陳妙英做既（嘅）白骨精都維肖維妙～

Kxx Kxi Hxxey：近排翻睇緊。。。正。。。

Kxxly Lx：張衞健做孫悟空真係型到跌渣，到依加都仍然覺得黎耀祥係豬八戒

最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。預知未來，相信好多人都希望做到，《東網巨星》APP其中一個重點節目《玄學星相》，除咗教識大家點樣催吉避凶，仲會以玄學角度，幫大家八盡每周娛樂熱話㗎！

最強娛樂APP「東網巨星」下載連結：

http://on.cc/redirect/entertainment