孖小齊拍節目似上賊船　梁漢文黑面想死

藝人任賢齊（小齊）與梁漢文（Edmond）早前參與Viu TV旅遊真人騷《價值連城》 （Barter Game），兩人去了大理古城、巍山古城、沙溪古鎮、西藏拉薩市、香格里拉－虎跳峽、石卡雪山等地兩星期，以物易物方式走勻全程，期間要幫當地人打工、餵羊、執牛屎，更要睡在藏民家中度宿。

小齊精力旺盛　Edmond想死

兩人每天八時出發，拍至三更半夜才可以睡覺，要走完古時馬幫經過的「茶馬古道」，對小齊及梁漢文來說也是第一次，小齊有名「堅捱得」，但也坦言今次行程有時候累得想死。Edmond就說最初四天，曾感覺上了賊船，又冷又累，有時累得頭暈及站不穩，過後適應了才開始享受真正旅程的樂趣。Edmond說：「頭四日我真係辛苦到黑面，連小齊問我嘢我都唔想答，日行夜行十幾個鐘，小齊都仲係彈吓彈吓，精力旺盛過攝製隊，之前啲人話佢過度活躍症我都唔信，今次堅信啦，哈哈，最初適應唔到簡直有想死感覺，我哋每日去邊度都冇計劃㗎，每日八點起身就出發，一直拍到三更半夜嘅真人騷，每日會去邊，坐咩車，瞓喺邊，食咩都唔知，要以物易物換到番嚟先有，我帶去啲豆豉鯪魚罐頭、按摩器，咩都攞晒出嚟換嘢。當地啲食物又全部偏鹹，啖啖油，但過幾日後咩都慣晒，本來唔敢食嘅街邊串燒羊肉，最後咩都食落口，太凍喇，唔食可能會餓死。」

佩服小齊

Edmond又指小齊簡直投入到有如當地人一樣，很佩服小齊那種工作精神與體力，他說：「對我嚟講今次真係自我體能嘅一個大挑戰，最後證實到我體力都唔差，雪山上踢波都仲得，過咗頭四日適應咗我先開始開心番，望番轉頭今次旅程係好難忘，好開心，體驗到好多城市人體驗唔到嘅生活，非常值得。」

豆豉鯪魚換入場券

問到小齊，有否感覺到Edmond黑面？小齊就笑說：「我哋兩個曬到黑到非洲人咁，佢日日個面都係黑色喎，我感覺唔到呀，其實Edmond好勁，好多時啲嘢都係靠佢夾硬去換番嚟，豆豉鯪魚罐頭去換博物館入場券佢都夠膽死，佢最寶貝嘅食物都提供晒出嚟畀我哋換嘢。我有問過佢，下次仲一唔一齊再出發，不過佢冇咩表情，冇應我，哈哈哈。」

Edmond可以再拍

Edmond聞言就說：「我估男人幫另外嗰兩個兄弟，或者應該跟小齊去試吓，訓練吓。不過我覺得其實除咗我，家強及阿公（蘇永康）都應該頂唔到，如果你第一、二日問我仲會唔會再答應一齊拍呢啲旅遊節目，我一定唔會，不過捱完兩星期，我覺得好難忘，再有下次都冇問題。」

救人一命

此外，爬上在香格里拉海拔四千五百米的石卡雪山，小齊及Edomd救了一個日本女人，Edomd謂當時他們登上山頂開心拍照留念，而身上反正帶了氧氣沒有用，但想着這麼辛苦背上來，不想浪費，於是沒有高山反應也拿出來吸，此際就發覺身邊有三個日本旅客，其中一個女孩子，坐下來面色發白，樣子非常痛苦，他們立即送上氧氣給對方吸。Edmond說：「我哋係睇住佢由面無人色，終於開始變番人色。最初佢連說話都講唔到，呼吸極度困難，佢身邊嘅朋友已經嚇到唔知點算好。」這次救人一命，小齊謂：「個日本女仔識講國語，不停多謝我哋，不停話我哋係佢救命恩人，山頂多謝到山腳，到佢喺山腳開始清醒番少少，仲突然驚覺大叫話認得我叫任賢齊。」

最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。如果鍾意韓風嘅，集中介紹最新韓劇、韓片同韓國最新歌曲嘅《韓劇榜》，同埋Highlight每周韓星訪港精彩片段，以及報道韓國演藝圈最新動態嘅《韓風吹》絕對啱晒你。仲諗咩呀！快啲Download啦！

最強娛樂APP「東網巨星」下載連結：

　http://on.cc/redirect/entertainment