徐少強《天蠶變》消失有原因

20160329
東網電視
更多新聞短片
徐少強話喺《天蠶變》消失唔係因為飲醉,而係合約上嘅原因。
徐少強在麗的劇集《天蠶變》飾演雲飛揚一角,紅遍香港及東南亞,惜中途鬧出易角換人事件,他親自剖白箇中內情:「《天蠶變》個戲嘅戲味唔同一般大俠戲,佢唔係一出嚟就好巴閉,佢係小人物,喺廚房煮飯畀人蝦,但武功絕頂,好好打,當年呢種題材係冇嘅,忽然嚟一個咁嘅故仔,觀眾好接受,連的士司機都要收工趕返屋企睇,連東南亞都有人識,我去泰國更加係人山人海,好似接Super Star機嘅場面,可以話係徐少強至今最紅嘅一個戲。」
但走紅背後,徐少強與電視台生齟齬,他說:「當年我有個花名叫『失蹤大俠』,因為拍拍吓《天蠶變》唔見咗人,當時話因為我飲醉酒,所以要換人。良心講,如果飲醉酒,醉一日、兩日都起番身,冇可能失咗蹤,其實當中有好多合約上嘅原因,因為我本身唔係麗的電視台,而係邵氏兄弟借將,我係有權唔拍任何嘢。當時《天蠶變》第一個30集紅到不得了,佢哋要即時加30集,但我有電影合約,要完成其他嘢,我冇可能同你忽然加30集,所以大家有啲拗撬,最後佢哋決定換人,但我都推薦顧冠忠,佢一樣係邵氏借過去,我認為呢個人外型好多方面同我好似,變人都唔好變到太離譜,所以推薦顧冠忠入去接手拍下一個《天蠶變》。」