篠原涼子江口洋介深夜密會開餐惹不倫戀疑雲

去年合作日劇《大人女子》嘅日劇天后篠原涼子同男星江口洋介，被今天出版嘅《女性SEVEN》雜誌踢爆近日深夜約會，指佢哋先係幫襯東京一間人氣日式烤肉店，邊食邊飲酒，到深夜12點幾再轉場到另一家餐廳，排排坐喺獨立個室繼續飲，仲愈偈愈High有身體接獨，直至深夜2點幾才離開。各自都有家庭嘅篠同江口，據指喺劇集煞科後不時約埋工作人員一齊食飯，不過是次只有佢哋兩個撐枱腳，而且表現都幾親密，難免令人懷疑是否不倫戀。<br/><br/>但大家似乎不用太擔心，篠原出了名是位賢妻，素來愛好杯中物嘅佢係兩位小朋友出世後都相當自制，前年演員丈夫市村正親患胃癌，佢亦刻意減產藉以抽更多時間照料，屬藝能界最佳夫婦典範之一。隨住兩位小朋友都開始返學，篠原去年秋天才開始飲番兩杯，據指是次相約江口亦只係為咗從主婦生活抖抖氣，翌日早上佢如常湊囝囝返學，上周又親身往支持市村主演嘅舞台劇。<br/><br/>而江口同妻子森高千里亦係圈中模範夫婦，育有兩位子女嘅佢哋，上月更被目擊結伴到夏威夷旅行，恩愛如昔，所以網友普遍覺得篠原同江口嘅不倫戀疑雲屬流料居多。