劉浩龍萌生退出：出碟先知有人支持

歌手劉浩龍（師兄）接受有線節目訪問，以宣傳相隔4年後再推出的新碟。入行多年的師兄直言曾對唱歌失去興趣，更一度萌生退出樂壇的念頭。他說：「之前喺舊公司，放咗好多時間去拍戲，唱歌嘅機會好少，令我對唱歌冇晒興趣，我覺得做每件事都要有進步，既然冇得進步，仲做落去都冇意思。我曾經懷疑大家都唔記得咗我，但其實好多都係自己對自己嘅壓力，今次出碟先知原來仲有人支持我。」

對電影充滿興趣

師兄又提到天后女友容祖兒對自己的支持，他稱女友已聽過其新碟：「當然有畀佢聽，不過佢唔會畀太多意見，因為大家都係做呢行，明白有監製監督。」他直言現時對演戲亦同樣感興趣：「以前除咗唱歌，我對其他工作都冇咩感覺，直至真係轉型做演員，拍完《飛砂風中轉》後，我搵到自己喺電影上嘅興趣。」

文筆唔好闖大禍

他又分享今次拍攝新歌MV的辛酸，師兄說：「導演要我喺石地赤腳跑，跑咗十幾次之後，我隻腳開始損。」他又難忘過往拍攝MV被狂潑油漆的經過：「上次拍咗13個鐘，冇食過嘢，沖咗七次涼，不停被潑油漆，第二日跑步我仲聞到自己身上嘅油漆味。」

重提到師兄早前於網上發表「污糟手」論，結果惹來不少負評，他再重申會作出反思：「我會再檢點啲，以後喺網上表達意見都會小心啲，我文筆唔夠好，情願親口講好啲。」