東網電視
更多新聞短片
錢嘉樂（左圖左）以伴郎身份出席好兄弟鄭敬基婚禮。
藝人錢嘉樂一身西裝以伴郎身份出席好兄弟鄭敬基婚禮，問到嘉樂的囡囡為何不做花女？他說：「未有安排，太太一陣嚟。」近年與鄭伊健、林曉峰、陳小春及謝天華為個唱四出走埠的嘉樂說：「因為鄭敬基一直唔講個日子，搞到我啲期係咁延遲，好彩最後班兄弟知道咩事，所以請咗今個星期假。」
鄭敬基婚前勁緊張
嘉樂踢爆鄭敬基昨晚撩他出外飲嘢，他說：「佢話係最後一個單身日子，叫我出去飲杯嘢，但我拒絕咗佢，因為今日我要車佢。」並透露對方緊張得凌晨致電眾兄弟起身：「佢驚我哋甩底。」認識鄭敬基近廿年的嘉樂說：「見到冇腳雀仔行番路，好開心佢搵到另一伴，我今日整鬼佢，佢好緊張，我笑佢搞得咁好、咁有經驗，原來佢係加拿大綵排過，兩兄弟百無禁忌，佢經歷咗一啲嘢，好難得搵到另一伴投入佢嘅餘生。」
做姊妹臥底
問到早上接新娘時有否被玩？嘉樂說：「當門一開我就做咗臥底，企埋姊妹嗰邊，好多謝姊妹肯接受我，唔夠上次我結婚啲姊妹辣。」嘉樂坦言最感激當年的兄弟鄭伊健，他說：「鄭伊健個頭唔畀人搞得，大家睇番啲相，伊健嗰日個頭畀絲襪笠到好似賊咁。」
