重播黎明經典神劇 網民齊玩集體回憶

20160518
東網電視
更多新聞短片
可能大家真係未必睇過,但好快就有得重溫啦!

早排個個都講憑韓劇《太陽的後裔》而Hit爆嘅宋仲基係新一代男神,近排講邊個?唔係唔講黎明呀?身為四大天王之一嘅黎明,一個4D演唱會令佢成為全城男神No.1,仲話佢有晒男神Package,號召力驚人!好似前日黎明開賣4D騷Blu-ray碟,唔使六個鐘已經有超過一萬個認購,唔怪得花生友仲話四大天王要重新排名,一致裁定排首位一定係黎明!

食住個勢重播黎明

黎明個勢hit到咁,有消息話無綫都打算食正條水,打算喺依家深宵時段播放嘅劇集《寵物情緣》播完後,緊接就係1990年黎明同周海媚主演嘅《回到未嫁時》!消息一出,當然又引起大批網民熱烈討論,不過大部分都話唔應該播《回》!吓?唔通唔L-I-K-E黎明?

非也!其實黎明當年喺無綫拍過嘅劇集,幾乎清一色都係有收視保證,而且話題多多,好多網民話如果識睇,緊係要睇《原振俠》同埋《今生無悔》,有網民直情話:「呢兩部劇一播,一定會掃場!」1993年播嘅《原振俠》集靚人靚歌靚景,王菲、李嘉欣、洪欣、朱茵有齊天后、大美人、玉女同性感女神,又有《願你今夜別離去》做主題曲,黎明又有唔同靚仔LOOK,嘩!真係喺邊到揾?

經典場面深入民心

雖然《原》劇已經係23年前嘅劇集,不過網民話一啲都唔OUT,仲齊齊玩集體回憶,話有好多難忘經典場面!先講王菲,當年佢飾演「海棠」呢個冷艷嘅角色,真係啱晒王菲,不過最爆嘅一幕,係講到喺山洞中見到黎明成為受傷的男人並凍到打冷震,一早暗戀黎明嘅王菲,二話不說除晒衫,赤裸裸獻身,吓?點解嘅?原來王菲諗住做人肉暖包,一絲不掛咁主動攬住黎明畀佢取暖!雖然大家都唔係好明,點解要除晒衫先可以取暖,不過當年嘅電視尺度再加上王菲個人嘅尺度,見到嘅只係王菲摟住件披肩攬住黎明就咁交待就算。

另一個大家最記得,當然係黎明吹簫!黎明呢個「原振俠」簡直同占士邦冇分別,本身係一名醫生嘅佢,識揸飛機、識耍花劍、識功夫一個打十個,真係冇乜嘢難到佢,最難得係佢真係文武雙全,連簫都識吹,而飾演改造人「黃絹」嘅李嘉欣更會聞簫起舞!而黎明每次高空跳落嚟,都會做一個屈膝兼雙手打開嘅「大鵬展翅」動作,呢個動作一樣咁經典!

至於1991年播出嘅《今生無悔》,就食正當年興嘅浪子Feel!話黎明本身係喺台灣闖蕩嘅浪子,話明係浪子,即係玩「騎着電單車的黑皮褸」,連場打交飛車場面乜都有之餘,又crossover埋「阿郎的故事」元素成為帶子洪郎,之後更周旋喺周海媚同邵美琪之間。網友話個故事講乜唔重要,重要係當年個個都會學吓黎明點冧女,咁先係今生無悔喎!網民仲話黎明同劉青雲、羅慧娟合演嘅《人在邊緣》都有重播價值,話首插曲《如果這是情》已經值回票價!


網民有話兒:

估x人:「黎明用個幾月時間就做返(番)四大天王之首。」
宋xx:「你唔係唔播原振俠、今生無悔嘛?」
Chxxxxx Txxxx:「今生無悔當年係無綫收視冠軍,仲要因為呢套野,黎明紅到成個香港!」
Paxxxxxyu :「如果播原振俠就有埋李嘉欣!」