二宮和也傳戀靚女主播　伊藤綾子樂做煮飯婆

日本國民偶像組合嵐嘅33歲成員二宮和也，過去曾與椎名法子、佐佐木希及長澤正美等女星傳出緋聞，今日出版嘅《女性Seven》雜誌踢爆佢有新戀情，對象係比佢年長兩歲、NTV黃昏時段新聞資訊節目嘅靚女主播伊藤綾子，指女方連續多日到二宮嘅寓所過夜。<br/><br/>報道指上月某個周末，居於東京超高級摩天住宅接近最高層一個逾1,000呎單位嘅二宮，離開寓所為嵐嘅巨蛋騷演出後，當天不用做節目嘅綾子於黃昏時段走後門到超市買餸，再返回二宮寓所煮飯等深夜才返歸嘅愛郎。有知情人士指由於二宮同綾子都工作好忙，平時難以外出食飯，加上二宮出咗名放假愛宅在家打機和睇漫畫，故綾子通常會留在家中為二宮煮飯仔，且特別鍾意一起食早餐，雜誌亦連續多日目擊綾子放工後買食材到二宮屋企。 <br/><br/>據指二宮於2012年為咗宣傳慈善大騷《24小時愛心救地球》而亮相綾子嘅節目結緣，及至2014年綾子聯同一眾女主播為嵐嘅遊戲節目《VS嵐》做嘉賓，兩人交換咗電話號碼變得經常聯絡，其後感情突飛猛進成為情侶。已屆適婚年齡嘅綾子公言恨嫁，並已向家人介紹二宮，不過佢十分保護戀情，即使向身邊人就結婚事宜問意見時，都未有透露男友身份。<br/><br/>雖然不知道二宮會否成為嵐首位結婚嘅成員，但因尊尼事務所暫時未有回應報道，且未有二人合照，有不少粉絲表示未能相信，指雜誌提到二宮所住大樓亦有不少藝人入住，女方嘅交往對象可能是其他人也不足為奇，另方面亦有不少網友支持兩人拍拖。