些牙明福俠穿崩片　黎明忟爆：頂你個肺

天王黎明（Leon）一向都好鍾意喺facebook同大家互動，仲周不時用變臉App化身「明福俠」氹大家開心！

早排佢喺端午節嘅時候，都上載咗一段「明福俠」嘅片祝大家端午節快樂。不過，正所謂港女自拍都要喺100張入面先揀到1張滿意，估唔到連「明福俠」都唔例外，原來早前段「明福俠」端午節快樂片拍咗好多次架，呢日Leon仲將佢多次NG片段同大家開心Share，當中唔止睇到「明福俠」黑面，仲聽到「明福俠」爆出一句「頂你個肺」，嚇到個心離一離呀！

網民讚貼地

睇番段片，「明蝠俠」唔知係咪因為講嘢講得太興奮，個人又周身郁，搞到個變面程式追唔到佢個樣，搞到現咗Leon個真身出嚟！嗱！第一次穿崩嘅時候，Leon都只係忍唔住偷笑咗一吓，不過到第二次，佢就開始忟忟哋喇，去到第三次，就喺37秒嘅時候，竟然仲爆咗句「頂你個肺」出嚟！天王都係凡人，佢唔只會講金句，仲會講「頂你個肺」！Leon share自己NG片，網民都勁冧，除咗瘋狂cap佢圖之外，仲讚佢「堅．貼地」！

講嚟講去講唔中

不過其實呢段片仲有一個亮點，就係畀NG搞到投降兼忟憎嘅黎明，不斷講錯對白，佢應該想講「肥豬肉＋鹹蛋」，但係佢得一次講啱，佢分別講錯嘅組合係「鹹肉＋鹹蛋＋肥豬肉」、「肥豬肉＋肥糉」、「肥蛋黃＋肥豬肉」，大佬，咩叫「肥蛋黃」同「肥糉」呀？真係笑死人冇命賠。