向雪懷親解筆名意思：懷念初戀情人

資深填詞人向雪懷接受電台訪問，講到大學讀電子工程的他竟然會當了填詞人，他解釋入行經過：「Form 7嗰陣爸爸有Cancer，咁啱知道寶麗金請助理，又冇乜要求就去做，所以一路做一路讀書，後尾由執嘢角色變咗studio maintainer，以前做歌要剪帶，我剪帶冇失手過，所以徐小鳳、鄧麗君都點名我剪，可能嗰陣就同artist建立咗關係。」

向雪懷亦表示是許冠傑發掘他填詞：「佢係全世界最識尊重人嘅人，嗰陣有隻歌佢填完問我意見，我返去諗，佢用咗廿分鐘嚟睇，之後就同人講『呢個細路都有啲天份』，所以我就開始填詞。」他亦透露自己筆名意思是「向初戀情人阿雪懷念」：「初戀好深刻，佢屋企好嚴，有段時間我哋冇聯絡，差唔多一年冇講嘢，好低落，跟住就諗佢唔聽電話但可以聽歌架麻，所以就開始用呢個名寫歌。（老婆知道咗呢件事有冇詐型？）詐到依家啦。」