有成員退出　少女標本嘆歌手難做

組合少女標本最近推出新歌《Sugar Free》，提醒大家要甜甜蜜蜜：「現代人追求健康，食嘢要無糖，但拍拖正正唔可以少咗呢樣嘢，一段感情要健康最重要係要記住當中嘅甜蜜。」她們亦表示歌名中的「Free」其實是跟「Three」玩食字：「代表少女標本會正式係我哋三個，之前成員（溫心）會退出，不過都覺得可惜。」講到此曲是輕快情歌，簡淑兒（Jessica）笑言會邊唱邊幻想未來的愛情：「幻想如果有一日我同金城武拍拖會係點，之後就會唱得好sweet。」。

大講情史

講到以前拍拖的難忘事，許雅婷（Kabby）表示曾有個既甜蜜又生氣的生日：「嗰年生日以為冇驚喜，但到咗嗰日，當時男朋友打電話叫我開門，一開就見到門口排咗一枝枝蠟燭，排到去?口，跟住我撳?落去，最好笑係呢個時候有個管理員上嚟話咁樣好危險，要趕我走，但其實個蛋糕係喺樓下，所以我就係咁講對唔住，其實嗰時係sweet得嚟又好嬲，覺得你畀surprise我但又搞着我，不過都係最難忘嘅一次。」

送過期曲奇餅

而在美國長大的Jessica則表示初戀首個情人節曾炮製曲奇餅送給男友：「以為好易將啲嘢攪哂放入焗爐就得，點知焗完塊曲奇餅仲係稔，係未熟，但我又趕時間，所以夾硬整起啲餅就走。」但她謂最後都送不成：「因為大家住嘅地方比較遠，仲要落大雪，佢上唔到嚟，之後一星期大家都要返學唔得閒，所以變咗送到去畀佢已經過咗成個星期，唔食得。」而袁紫僑（Coco）則謂拍拖時很多小事都很sweet：「可能我只係無意中提起少少嘢，但隔咗兩日嗰樣嘢就出現咗。」

冇錢畀家用

講到感情，單身的她們表示現時工作為上，但緣份到都不抗拒，其中Jessica更大爆已被家人催婚：「阿爸阿媽次次打電話畀我都有催，細個爹哋好唔鍾意我打扮，但依家竟然調番轉，佢叫我要着多啲高踭鞋先有女人味，驚我太過男仔頭會冇人要，我就同佢講畀兩年時間我，但係無了期嘅兩年。」另外，講到不久前是她們成立一周年的日子，問到現時是否已捱過辛酸？她們笑言：「每一日都捱緊，但都知依家做歌手唔易，公司都同我哋講過頭幾年係會辛苦啲。」她們亦坦言現時未算賺到錢，平時又有應付上堂學唱歌等不同開支，故現時還未有錢給家用：「有時都要家人接濟，但爹哋媽咪都支持我哋入行，希望30歲前可以賺到錢養屋企人。」