FB直播報平安　邵音音澄清芳齡66歲

資深演員邵音音日前喺韶關出席活動時，突然心紋痛要送院，事後音音回覆《東網》話自己心臟大動脈撕裂。今日身在醫院嘅音音，喺Facebook直播同粉絲報告平安。

痛到講唔到嘢

喺直播中，見素顏上陣嘅佢，講嘢都好似冇咩氣力咁，佢仲話今日係「鬼節」同時又係佢66歲生日，仲話以前年代畀人知道係鬼節出世會出街畀人打，所以邵媽媽呃咗音音，話佢係七月十五生日，喺舊年先「真相大白」，音音話：「我8月14號入院，今日可以講到嘢，因為早兩日唔可以呼吸，呼吸嗰度好痛。喺66年前嘅今日，農曆七月十四，我阿媽就生咗一個BB女，嗰陣時如果七月十四生個女會畀人打㗎，所以佢要求廣華醫院個護士叫佢寫多幾日，唔好寫七月十四。我阿媽一路都呃我係農曆十五出世，咁所以呢，我年年都係七月十五過生日，舊年喺日本佢突然之間同我講其實係七月十四生日，原來我過咗64年遲一日嘅生日，佢話因為唔得嘅，畀人知道我哋喺街會畀人打。唓！我不嬲都成日都畀人打㗎啦，不過依家你打我，我打番你！」

不停騷針窿

而佢又自嘲66年前嘅今日同依家呢一刻，佢都身在醫院，仲喺直播中不斷騷佢嘅針窿，見佢仲上半身插住某啲儀器，真係睇到都好心痛：「不過66年前嘅今日，我喺廣華醫院，今日呢我又喺醫院，嗰日66年前我係出生，今日呢就出事，你睇吓我呀全部都係針窿，抽血抽到瘀晒。」所以唔少網友同朋友見到佢咁，都紛紛留言叫佢要好好休息。