「變裝女皇」Conchita襲港　空姐Chok腿迎戰

奧地利歌手「變裝女皇」Conchita Wurst今晚7時40分喺香港啟德郵輪碼頭出席奧地利航空晚會，慶祝全港獨家直飛維也納航線將啟航。Conchita以招牌鬚鬚襯長髮造型現身，着咗件超Deep V嘅黑色長裙出場，雖然中門大開都唔會有咩嘢睇，但係都好有誠意好性感吓！佢一出場就二話不說唱咗佢係Eurovision歌唱比賽歌曲《Rise Like A Phoenix》，騷佢雄厚得嚟又澎湃嘅歌喉，出盡力連條頸都紅埋，配合埋背景團火，真係成個「火鳳凰浴火重生」咁款，現場唔少嘉賓都湧上前集郵，唱完之後Conchita仲好cute cute咁側一側頭送飛吻，不知幾可愛。

晚上8時30分，Conchita再度出場，同樣以全黑打扮示人，轉玩中門透視look。Conchita再度獻唱《You Are Unstoppable》，受訪時話今次喺佢第一次嚟香港，覺得好興奮，仲賣花讚花香：「我今次喺坐澳地利航空直航飛嚟，唔係因為我出席活動先咁講，佢哋真係好好！」相當識做！Conchita另外講到當明星後嘅感受：「其實無咩太大改變，好感恩大家咁支持，會有興趣影我相。」好享受成為焦點，好難唔鍾意自己依家過緊嘅生活。

講到有咩出國必定要帶，Conchita就話：「一定係化妝品同頭髮！」雖然冇咩話要帶奧地利特色物品隨身，但每次出國都好掛住奧地利嘅甜食。至於佢最近喺社交網share創作咗一半嘅新歌，Conchita：「我唔係真係勁有才華，不過得到粉絲咁支持真係好開心。」

最後，Conchita再表演歌曲《Firestorm》，唱完就同一大班航空服務人員合照，反而班空姐仲戰鬥格過Conchita，Conchita企直直影相時，有空姐即刻chok個「祖莉腿」出嚟搶鏡，又有空姐唔怕走光，就咁走到台前面側身坐低擺甫士，即刻搶晒全場焦點！