網民熱話：Dear Jane三部曲超洋蔥！

近年香港樂壇多咗好多歌手以三部曲去包裝，甚至拍出一系列嘅MV。繼早前麥浚龍嘅《耿耿於懷》、《念念不忘》及《羅生門》三部曲後，最近樂隊Dear Jane嘅《哪裡只得我共你》、《只知感覺失了踪》及《經過一些秋與冬》組成嘅三部曲亦備受關注！吸引觀眾除咗係以「三部曲」包裝得好之外，個個聽完啲歌詞都話好中，亦大讚MV男女主角「文青女神」袁澧林（Angela）及男模胡卓希（Jason）飾演高小曼同陳浩然嘅愛情故事做得非常好，當然唔少得讚佢哋靚仔靚女啦！

網民期待第四部曲！

第一部曲嘅《哪》出街時已經好高點擊率，最近終於推出埋《經》，個個都話等到頸都長！網民對於Dear Jane今次嘅作品有讚冇彈，其實所謂嘅讚係充滿住「洋蔥」，話啲歌詞可以再中啲，尤其「無謂再關心你 我沒資格慰問你」、「如果准我重新學過可會白頭」好似身同感受咁！亦有眼淺同完全墜入故事嘅網民留言話睇到忍唔住喊，又埋怨「Dear Jane有邊次會happy ending...」有眼利網民發現《經》MV同台灣天團五月天《我不願讓你一個人》嘅MV好相似，又係講述一對情侶由熱戀、冷淡至分離，到最後女主角已經有另一個他，雖然男主角一直都記得同女主角相處嘅快樂時光，但都冇主動去搵過佢。而MV最後出現過「第82章」嘅字眼，呢度又令網民覺得將會有第四部曲，紛紛都話好期待呀！

網民有話兒

Hxxdi Mxx：會唔會出隻碟包哂（晒）三首歌？

肥XXX王：band友做情歌絕對係dear jane飲左（咗）頭淡（啖）湯

子X：有邊個同我一樣係感同身受，聽聽下（吓）聽到眼淚係咁流

Edxxx xxng：等左（咗）好耐，估唔到呢首歌俾（畀）到一種唔同既（嘅）感覺

luxxx sxx：陳浩然高小曼一齊翻（番）啦好嗎？