同張智霖似樣？混血B女萌爆搶鏡

藝人張智霖（Chilam）闊別兩年，再推出全新EP《HERO》，這張EP主題為表揚父愛，歌頌天下父親為家庭所付出的努力。拍攝封套當日，工作人員特別安排萌爆的混血B女和Chilam齊齊拍攝，混血BB面對陌生環境，初時不斷哭鬧，需要媽咪在旁安撫。不過，現實中為人父親、與小朋友相處經驗豐富的Chilam，當他一抱BB，BB頓時展露笑容，大晒甜笑，攝影師亦趁機拍下二人溫馨窩心的一刻。

同Chilam一樣有酒窩

混血BB在大笑時，原來跟Chilam一樣擁有迷人酒窩，就連Chilam也說：「佢真係同我有啲似樣。」着皮褸的Chilam還抱住BB坐電單車，一大一細都好有型，但最搞笑的是BB對周遭事物都感好奇，竟然一時「發牙痕」，咬住Chilam的領呔和皮褸。

相隔兩年再出碟

對於兩年後再推出新碟，並以「父愛」為主題，Chilam直言以往的歌曲比較側重母愛，相比之下較少歌頌父愛，他說：「其實喺一個家庭入面，爹哋同媽咪嘅角色係同等重要，父母對子女同家庭嘅愛係無私奉獻，只不過爹哋嘅表達有時可能會含蓄啲。我覺得依家嘅歌曲唔一定講愛情，呢次EP主題講父愛嘅偉大精神，我覺得好有意義，亦可以帶出一啲正面訊息。」