攝製隊非洲拍攝受襲　岑樂怡畀富二代追

ViuTV主持岑樂怡（阿妹）及吳蚊蚊早前遠赴多個神秘國家拍攝節目《404不存在的國落》，包括非洲的索馬利蘭共和國、意大利北部小國塞波加公國及立陶宛鄰迎的對岸共和國等，這幾個國家雖然不被其他主流國家承認，但有自己獨特的文化及歷史，阿妹這一段另類旅遊經歷，既充滿刺激亦有難忘事！

當中在索馬利蘭共和國發生了大量奇事，節目導演及監製更被襲擊及沒收相機，過程驚險，阿妹說：「我哋分開兩部車坐，期間我哋個司機突然收到另一架車訊息嗌救命，之後坐嗰架車嘅導演、監製同攝影師唔見咗，搵晒幾間差館都唔見，原來佢哋影咗一幢唔影得嘅監獄，班獄卒發現即刻衝出嚟打佢哋，仲拉咗佢哋入監，沒收埋攝錄機，過咗幾個鐘導演佢哋終於被釋放，返到酒店。」經過連日來向官員及一位富二代求助，他們終成功取回攝錄機，但已經沒有了記憶卡。

而該位富二代一直協助他們拍攝，對方更想追求阿妹，想不到遊非洲都有艷遇！阿妹說：「我哋真係做咗朋友，但唔會接受啦！大家都生活喺唔同國家！」另一日阿妹及蚊蚊則遇到頑皮小孩，他們在街頭拍攝時，突然被圍攻的小朋友掟石頭，甚至有人將整頭羊拋向蚊蚊，令兩人大驚，阿妹說：「不過佢哋只係貪玩同曳，唔係有惡意嘅！」

經過訪問這個貧窮國家，令阿妹有很深體會，令她更覺得香港人身在福中不知足，因此要更珍惜擁有的一切：「平時只係喺紀錄片或者慈善機構短片見到佢哋，但今次真實去到呢個地方，真係會喊，好多屋企都好簡陋，只係有荊棘圍住間屋，一個媽咪湊住幾個小朋友，見到啲小朋友好天真，真係唔想佢哋長大，唔想佢哋知道世界咁殘酷。」

至於阿妹在塞波加公國的經歷完全不同，這次則有皇室享受，能出入皇宮採訪，阿妹又再有艷遇，被年僅13歲的意國靚仔追求！