貝依霖被封「女神」　網上收色情圖片

新進歌手貝依霖（Chantale）近日憑內地節目《Hello女神》彈出，被內地網民封為「新一代女神」，Chantale為了節目隻身走到內地差不多三個月，問到是否覺得辛苦？Chantale說：「之前係香港消失咗兩個幾月，就係參加咗內地節目，都幾辛苦同掛住屋企。（有冇諗過放棄？）中間有好多困難，比較熟悉香港工作模式，去到內地唔太熟悉，中間有好多比賽元素，令我一度諗過退賽。（點咬緊牙關？）呢個比賽係靠歌迷畀錢投票，每個女仔都有個榜，邊個Fans投咗幾多錢，我見歌迷投咗我好多錢，唔想浪費同辜負佢哋啲錢，同埋都玩到一半，不如堅持落去。」

對香港樂壇充滿信心的Chantale說：「好多內地觀眾係好鍾意香港歌，有好多歌詞我唔記得佢哋提我，香港音樂係唔同地方都咁多人支持。」由於同場有八個女仔，問到當中有否是非及不和？Chantale說：「頭半段冇乜，十個女仔都相處得好好，因為賽制每個星期踢走一個女仔，直到有次有個女仔畀人踢走，全部人都有啲唔開心，之後換咗新女仔入嚟，就開始唔團結。（依家仲係咁？）新加入個女仔自己已經退咗賽，依家變番原先九個女仔。」她坦言不時與眾女仔交換化妝品，Chantale說：「有時唔記得着打底褲，都會借畀對方。」

問到有否內地富二代力追？Chantale說：「每個星期都有人送花、零食，相信係粉絲，微博人數激增同私信。（私信妳去飯局？）暫時未收到，只係有啲色情相片，未去到明目張膽問。（有人開價個心會唔會動搖？）唔會。」Chantale承認有不少人追，她說：「一定有，話冇就講大話啦，希望將重心放係工作上，大陸呢邊啱啱開始，又要周圍飛，有另外一半又要照顧佢時間同感受，就會覺得好麻煩，你要追就追啦。（合眼緣都唔發展？）有合眼緣，因為時間關係，我又唔係成日係香港，佢又好忙，鍾意我就追啦，等唔到都冇辦法。」