【每年都勁迷惘】SG自身經歷勉勵青少年

組合Super Girls（SG）今日到學院出席分享講座活動，吸引近200名學生出席，其中更是男同學居多。SG表示看到新聞見到青年有好多問題，她們希望藉講座跟他們分享經歷：「我哋入行都遇過好多經歷，都會同佢哋分享點樣堅持夢想，因為依家年輕人比較容易放棄，我哋入行都遇過好多挫折，但我哋都堅持，如果遇到問題，其實大家可以同身邊人傾訴吓。」<br/><br/>SG坦言入行至今遇過很多困難和問題，令她們對前景覺得很迷惘，她們說：「你永遠唔會知道個方向，呢樣嘢係最辛苦，你唔會知道你努力咗咁耐、咁辛苦，個回報返嚟可能就咁拍手就完咗。你嘅前路永遠唔知道下一步係點，呢樣嘢係最驚！每一年我哋都好迷惘，每年都要計劃下年要做乜，推出啲乜歌，有啲咩新嘅方向、嘗試，有啲咩可以令到我哋呢個組合更加好。」<br/><br/>驚被淘汰<br/><br/>她們表示無論Super Girls或社會上任何一個行業，最驚就是被人淘汰和被遺忘，她們謂：「即使你幾努力，但大家依然唔知道，唔知你嘅存在，呢樣係最辛苦，唔知可以點，所以我哋最想同年輕人講，要學識點樣去堅持。」SG又指作為樂壇組合最難之處亦因是組合，五個人有不同意見，雖然經歷過很多事，令各人的想法已變得相近，但隨着慢慢成長，又會有好多新人、新組合湧現。她們說：「我哋個定位係點呢？好似歌唱界，依家香港又冇韓國、外國咁蓬勃，我哋可以點樣support番自己個樂壇？喺內地、電影方面又點先可以push up自己，係我哋成日諗嘅問題，同埋老實講因為我哋係組合，收入要除五個嘅關係，所以喺收入方面比較低、痛苦，要更加努力做嘢，可能人哋做一份，我哋要就接5份。」<br/><br/>拗完交唔會有心病<br/><br/>成員Yanny表示團隊精神也很重要，她表示根據自身經歷，明白到一件事的成功，不能忘記團隊精神，她們又直指五人會有鬧交的時候：「係正常嘅，五個女仔一定有唔同意見，親生姊妹都會有鬧交，但我哋拗完會傾番，唔會有心病。但我哋啲脾氣有啲差，有乜會即刻爆、鬧晒出嚟，呢樣嘢好好，講完就冇事，（會眼紅邊一個比較紅、受歡迎？）唔會，反而多謝佢戥佢開心，因為佢幫到個組合，我哋當大家係親姊妹，不過我哋好易眼紅，尤其是喺台上好易好感慨就會眼紅想喊。」<br/><br/>開騷前夕緊張失眠<br/><br/>好多樂隊、組合總會合久必分，對此SG言：「所以我哋就希望行到幾耐得幾耐，希望我哋每個人都可以獨當一面，再將呢樣建立番喺組合裏面，咁我哋組合可以行得更加遠。」距離演唱會開騷日只剩下10日，她們承認壓力很大，無論身體上或心靈精神上都負荷好重，甚至失眠，並謂希望公司能給她們更多休息時間，因為她們很擔心開騷前會病倒，她們笑言：「如果下次再開騷，希望公司可畀半年時間我哋準備，最好開騷前一個月就唔好再安排工作。」