名人：姚書軼轉戰飲食界搞高檔私房菜

名模姚書軼（Mikki）由模界轉戰飲食界，與數名友人一同於銅鑼灣開設高檔私房菜，餐廳佔地六千多呎，分為大、中、小三房，更有酒窖讓客人存酒，問到為何突然轉攻飲食界？她說：「本身嘅模特兒工作都會繼續做，不過好多嘢可以同時發展。其實我哋幾個合伙人每人都做唔同範疇，大家都發現嘢食好味、環境又好、私隱度高嘅餐廳真係唔多，所以就諗住整返間。（怕畀人偷拍？）我唔怕，但好多人性格唔同，其實做生意嘅人仲想要私隱度。」<br/><br/>難估計回本時間<br/><br/>Mikki透露數名股東合共投資逾千萬元於餐廳，即每人至少付七位數字，非常揼本，提到餐廳選址租金昂貴的銅鑼灣，Mikki坦言亦曾到不同的商業大廈看舖作比較：「呢個大廈嘅外形係簡簡單單嘅西式建築，喺出面見到已經有好感，想啲客人由內到外都覺得舒服。」問到預計何時回本？她直言難以估計，但她自己持正面態度，很有信心。<br/><br/>試菜肥十幾磅<br/><br/>首次做「老闆」，Mikki嘆做生意毫不容易，首先菜式要有新意，質素要有保證，她選取中式食品，但以西式形式上菜，每道菜式都十分精緻，包括22頭干鮑、鹵水鵝肝、芝士龍蝦麵、避風塘大海蝦、水煮魚等，每一道均真材實料！她自爆為確保食物質素，每道菜都會試食，結果在短短兩個月間肥了十多磅！她笑言：「因為我真係每一碟都食晒，發現咁樣唔掂，所以依家會控制自己只可以食一啖，自此慢慢FIT番。」<br/><br/>名人光顧<br/><br/>餐廳試業期間，Mikki邀請名模好友馬詩慧、琦琦、洪華及老公黃國榮（Sunny）前來「試味」，各人都大讚現場環境好夠寬敞，有水晶燈、長餐枱、大梳化、歐陸式擺設、鏡子等。她說：「我負責餐廳嘅裝修，呢度嘅每盞燈、鏡，連廁所嘅牆紙都係我一手揀㗎！籌備咗八、有個月，我依家對跑馬地、鴨脷洲好熟路，哈哈！我嘅設計意念係簡單得嚟要夠隆重，想空間感大啲，唔想放太多嘢。」Mikki更大爆餐廳已有不少有頭有面的名人來光顧，包括劉嘉玲、關之琳、章子怡等等。<br/><br/>拍拖難過創業<br/><br/>問到Mikki如今忙於餐廳，會否忙得沒時間拍拖？她說：「拖一定有時間拍，問題係有冇對象，依家拍拖仲辛苦過創業，要維繫感情好辛苦，工作都話你付出多啲，就會有多啲收穫。」Mikki身邊不乏追求者，可惜自己是「炮仗」型女友，對住另一半會發脾氣及易躁底，有時候對方不理解她，她又懶得解釋，所以她覺得單身比較好。