爆求學辛酸史　阿旦：5點就起身返學

藝人鄭丹瑞（阿旦）、蔡康年、雷宇揚及布志綸等，到灣仔會展出席聖保羅書院165周年舊生晚宴，有份擔任司儀的阿旦說：「想推，想唔做，因為想起到承傳作用呀！但推咗5百次都唔成功，冇法啦，推唔到，但今次做埋，到下次再做就係170周年，到時可能我都抱咗孫啦！」

阿旦自爆當年獲派此校感到十分突然，他說：「我係聖保羅書院1974年嘅畢業生，但其實呢間學校係我第二志願，第一志願係喇沙，而我填聖保羅係因為我家姐讀聖保羅男女中學，後尾至知原來唔係同一間學校，搞到我入浸會至知呢個世界係有女人嘅！講番當年返學，我屋企住深水埗，嗰時真係連阿爸阿媽都唔識教我點返學，結果我係由屋企行去深水埗碼頭，過海再行返學校，嗰時要朝朝5點鐘起身！不過呢間學校好好，畀到我開發自己創作嗰方面嘅能力，我都好感激！」