【成年前…】茜利妹發聲明轟Miss Hunny

電台主持人茜利妹喺凌晨發咗個聲明，就話千不情萬不願助長抽水者有更多曝光機會，跟手就開名道姓直指網紅Miss Hunny失場，情況係一年前茜利妹約咗Miss Hunny做訪問，時間為下晝三點，但係夠鐘開始都未見Miss Hunny現身，負責聯絡嘅公關公司不停聯絡，得到嘅答案都係「到緊喇到緊喇」，去到三點半因為租場做訪問嘅地方要歸還，所以就取消咗成個訪問。當年茜利妹喺fb都有開火怒轟呢位失約人。成件事最奇就係一年前茜利妹開火係冇開名，淨係話某位90後網紅，點解一年後先至要出聲明開名呢？

原來早前Miss Hunny接受咗個訪問，爆自己曾經患子宮頸癌，當年等緊報告所以遲咗去做訪問，仲話已經通知咗電台主持人自己生癌所以遲到，但係電台主持人以為佢搵藉口所以取消訪問。Miss Hunny呢個訪問一出，佢啲持者就係茜利妹嘅fb留言，鬧佢黑心唔體諒人，人哋有病都要踩一腳等等等。就係因為畀人不停鬧，茜利妹先至要急急係凌晨出聲明，除咗交待番件事，茜利妹仲講明，當時冇同Miss Hunny直接對話，亦唔知佢有病，當時喺fb開火絕對唔係「踩多一腳」，當年事發幾個鐘頭後，Miss Hunny嘅經理人先至WhatsApp佢，話因病所以失約而致歉。

茜利妹話自己有晒時間證據喺手，但係冇諗過公開人哋個名，今次咁做係因為有人將錯誤嘅版本當真，仲開始攻擊佢，所以佢先至要發聲明講出真相。