東網電視
更多新聞短片
林敏怡為咗幫朋友醫病，所以去學能量治療。
1/6
樂壇校長譚詠麟的經典作品《幻影》、翁倩玉唱的《阿信的故事》都是出自著名作曲人林敏怡，下月初她將與前DJ洪朝豐舉行《靜心。能量。音樂會》，敏怡除了演出，還兼任大會監製，談到音樂，當年在歐洲學現代音樂的敏怡透露由意大利返港後，她笑說：「嗰陣時我彈埋啲冇乜人明、作埋冇乜人明嘅嘢，但我樂在其中，但後來諗吓音樂係要同人溝通，只係得自己過癮，唔係太make sense，你永遠活喺自己世界、牛角尖，或者得幾個行家欣賞你，去過國際現代音樂嘅Expo，個圈子好細，見嚟見去都係嗰班人。」
敏怡又形容自己莫名其妙入了電影圈做電影音樂，她說：「你要打動到人哋個心，幫助到電影，配合銀幕上嘅畫面，你冇可能自我陶醉做啲冇音調嘅嘢，有時係得，但大多數係需要一個好靚嘅旋律，譬如《這是愛》係電影《胡越的故事》主題音樂，我係有個轉變，我都好enjoy，之後嘅流行曲我都唔知點解差咗隻腳落去，有人叫我作歌咪作。」
由音樂人搖身成為能量治療師，緣於十年前一位中學同學患癌陷於病危，她說：「啲同學突然又走一個，個個都係癌症，我好唔忿氣，開始想學一啲另類療法，雖然好多人覺得係匪夷所思，但我有自己嘅堅持，當見到自己學生用我教佢嘅方法，加以運用幫到佢哋啲朋友、家人，我覺得係好開心。」今次音樂會比較另類，她笑言：「自己搞梗係唔搞，佢（洪朝豐）孭飛孭多啲。」其實敏怡曾經在香港太空館舉行過一個類似的音樂會，點解今次她自己唔搞？她說：「要凝聚力量，有一個團隊差好遠，洪朝豐係發起人，我係第二個發起人，但我個責任有喺度，要做到最好，否則唔好做，我做監製乜都要睇。」洪朝豐希望今次音樂會是一個開始，他希望將靜心、能量結合成音樂會的概念，繼續發展下去，他說：「我哋唔排除下次喺紅館搞。」
作為一個抑鬱狂躁症的洪朝豐，近年靠打坐靜心，令他食藥的後遺症得以改善，初期手震得好犀利的洪朝豐，連篤手機的字母或數字都點不準，要靠一枝筆去點，他說：「我都冇諗過透過打坐，我手震嘅情況改善到好多，依家可以就咁用手點。」其他副作用會令人易肥，所以他在食方面會控制住，他說：「有啲人會出疹，我又OK有嘅，所以如果我食藥有呢啲副作用，我覺得唔係大不了嘅事，我可以繼續玩音樂，照去賺錢，如果我有才華，好似我醫生講：『洪朝豐你作為一個抑鬱狂躁症病人，你食藥係唔會影響你才華嘅發揮』，所以就我個case，如果食藥能夠控制到，我咪繼續食。」他希望透過來參加音樂會的朋友，心靈能夠提升，有種沉澱及了悟。
林敏怡覺得可以幫到人就做開心。
因為有人叫林敏怡作歌，咁佢就作咗唔少經典作品出嚟。
喺莫名其妙嘅情況下，林敏怡入咗電影圈做音樂。
林敏怡同洪朝豐即將舉行《靜心。能量。音樂會》。
做音樂應該要同人溝通，唔可以活喺自己世界。
