投資千萬！馬德鐘開蠔吧睇舖裝修

向來投資有道，愛食腦的藝人馬德鐘，除了買馬投資外，他與家人又經營傢俬店，去年與家姐和兄長合資七位數開日本餐廳，以紀念亡父。近月馬德鐘與太太投資近千萬，計劃在黃埔開蠔吧及紅酒店，早前見他與太太親自落舖睇裝修，店舖裝修尚未動工，到處沙塵滾滾，難得他們夫妻倆完全不介意，同行有幾名裝修工人跟他們有傾有講，一向對裝修甚有研究的馬德鐘，不時走來走去指指點點，一人用兩個電話，邊講電話邊睇裝修，甚為忙碌。

力不到不為財

對於投資買馬做馬主，馬德鐘未有透露金額，只說：「好細份，參與吓，一齊開心就好。」對於再開食肆，他表示：「做食肆真係初哥，邊學邊做。上年開咗『松』日本料理後，就好有興趣發展飲食業，因為除咗自己鍾意美食，仲好鍾意有創意嘅健康飲食，所以今次會開一間西餐廳，有唔同煮法嘅蠔，旁邊就會開一間賣酒嘅店。睇中呢區地點人流多，餐單主打OL需要，佢哋對食要求快，又要健康，太太之前做過有關健康長壽嘅研究，對飲食好注重，佢都畀咗好多專業意見我，大家一齊搞。」他說自己的座右銘是每事都親力親為用心去做，覺得力不到不為財。

唔會「微管理」

問到兩間店是否投資近千萬？馬德鐘說：「唔好講幾多錢啦！手作仔試吓，做生意必須有實際經驗，全程投入，唔應該紙上談兵。」他還分享做老闆心得，認為老闆要掌握裏裏外外的情況，由廚房、樓面、公司管理、市場策劃至採購都要知，絕對不可「微管理」，他說：「用人不疑，疑人不用」

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon