峇里出嫁！林伊麗孖老公煙花下激吻

有「翻版張鈞甯」之稱的無綫娛樂新聞台女主播林伊麗（Michelle）曾參選港姐，予人乖巧斯文的形象，這位索女最近封盤，與金融才俊男友Henry Chow在峇里舉行婚禮，兩人穿上婚紗及禮服，在親友見證下成婚，Henry更於晚宴期間安排煙花，兩人在璀璨煙花下錫錫，浪漫爆燈！

笑老公似女人

Michelle接受東網訪問，表示婚禮花了大半年時間籌備，很感激雙方家人支持他們舉行海外婚禮：「請咗大約24位親友，由香港、美國、新加坡及上海飛過來觀禮，七月我會喺香港補擺喜酒。（最難忘係邊部分？）宣讀誓詞嗰陣，我覺得講結婚宣言應該係女仔喊，應該好感人，但佢講先，講咗第一個我字之後就開始喊，喊到講唔出嘢，一路喊咗成兩、三分鐘，最後只係講咗I Love You，我已經覺得成個過程好感動！佢又搞到來賓同家人都一齊喊，但因為佢喊，到我講宣言嗰陣就反而好有條理咁講晒出嚟，搞到好似佢似女人，我似男人咁樣！」

求婚冇攞戒指

Michelle又表示Henry去年在法國旅行期間求婚，但當時未有掏出戒指，她已順灘地應承：「舊年5月20日，當時我哋喺歐洲法國嗰邊，有晚兩人喺海邊望海，佢突然間同我講：『不如嫁畀我吖』，佢係完全冇跪，亦冇攞戒指嘅，但唔知點解我應承咗，之後佢攞隻戒指出嚟話其實佢有準備，不過佢一開始想喺另一個地方求婚，但一直冇機會去到嗰度，所以話唔等喇，就直接喺南法嗰度求婚，佢話太緊張，所以一連串動作咩跪低、攞戒指嗰啲全部唔記得，我係應承咗佢先攞戒指出嚟，所以我成日都同身邊朋友講，老公求婚嗰陣係冇攞戒指嘅！」問到婚後會否做全職太太及生育計劃，她說：「婚後會繼續工作，想過二人世界一陣先，生BB順其自然。」