梁雁翎遺憾膝下無兒：慣咗自在生活

有「卡拉OK女王」之稱的梁雁翎（Annie）早年淡出香港樂壇，三、四年前她曾返港為黃凱芹演唱會做嘉賓，今年5月她將會舉行演唱會。

簡簡單單過一世

近年Annie與老公北京、香港、廣州四圍走，Annie的老公是一位醫生，但已退休，她坦言與老公緣份好深，她笑說：「我哋係同學，我返北京後咁都撞得番。（同老公結婚25年？）係呀，好彩我冇揀錯。」兩公婆膝下無兒，Annie坦言：「慣咗自在生活。（點解唔生？）可能細個喺大陸生活比較艱苦，經歷咗好多，體會到養細路仔唔易，驚自己畀唔到好嘅條件啲小朋友，會覺得幾大壓力。」她坦言都會有遺憾，始終中國人社會的思想，覺得應該要生小朋友，她說：「以前啲朋友、屋企人都會問點解唔生？又會催吓，但依家唔會囉，咪同老公兩個簡簡單單過埋呢一世。」

北京、香港、廣州都有物業

因為要籌備開騷，目前她會留港居住，她表示開騷時老公會來港捧場，問到她是否在北京、香港、廣州都有物業？她坦言香港、北京都有物業，她說：「廣州就冇，我哥哥一直長住香港，細佬十幾年前都返咗去內地工作，之前佢接咗爹哋媽咪去廣州住，所以我得閑都會去廣州探父母。」

Annie由當年飛圖老闆葉志銘一手捧紅，Annie說：「我三、四年喺番禺探過葉生，不過知佢近年身體唔係咁好，佢屋企人同佢返咗嚟香港住。」Annie表示跟葉生的細仔也有見面，因為對方在廣州工作。