讚張衞健獨一無二　簡淑兒：驚忍唔到笑

宅男女神簡淑兒（Jessica）及朱千雪到尖沙咀出席復活節活動，Jessica即場獻唱了兩首歌曲《陽光點的歌》及《高山低谷》，但見她表演頗為緊張，全程硬晒軚，原來她聲帶發炎。

染病個個彈開

擔心失準令Jessica緊張到手震，公司亦為她揀了一些音樂墊底聲較大的歌曲版本，她說：「睇咗三次醫生，食咗兩星期抗生素，都未好晒，之前仲失聲添！依家叫做好咗啲，我轉天氣就易病，又成日捱夜唔錫身。（向公司請假？）冇呀！家人都有叫我休息多啲，但呢行冇㗎！除非入院，我都仲頂得住，依家已經好番啲，剛剛發病時把聲沙晒，但幕後以為我把聲係咁，大家知道我病之後，個個都行開，怕畀我傳染！」

幫我諗埋對白

談及最近趕拍《大帥哥》劇集，Jessica跟好戲之人張衞健（Dicky）有同場，大讚對方超勁：「現場見到先知真係咁犀利，佢好特別，前輩話最強演員係令到個角色獨一無二，佢真係加咗好多自己嘢落去。（佢有權改劇本，有冇改你啲對白？）佢有咩想改，會直頭幫我諗埋，同我對埋，先開始拍。（驚唔驚記唔切？）好彩我唔算好多，其他人都好開心喎！佢令到成件事更加好笑，係驚忍唔到笑咋！」