嘆享樂團解散似分手　伍定彥：都冇辦法

歌手伍定彥（Don）之前是享樂團的主音，他表示7位成員都另有正職，包括音樂、健身、餐廳等行業，有時兼顧不來便比較少夾Band：「都好正常，我有好多Band嘅朋友夾幾隊Band，有時散Band之後又重組番，鍾意音樂嘅大家都支持大家。」他坦言收入不多，表演後不時要添置器材及服裝：「基本上收入係零，騷錢都擺晒落去做音樂，嗰時真係為興趣而玩音樂。（通常每人每次有幾多？）幾百蚊港幣，有時唔係好大型嘅騷，可能1,000蚊7個人分。」Don指當時每月約有兩、三個騷，除了本地，亦去過台灣演出，為了交流和吸取經驗。

提到享樂團解散，Don覺得就像與拍拖已久的女朋友分開：「仲鍾意，但冇咗熱情，有少少酸溜溜嘅感覺，好唔捨得，都冇辦法，但都仲可以一齊出嚟玩同Jam歌。」至於自己獨立發展，他表示沒有懷疑過自己的能力，認為表演不會有問題，只是面對媒體時有點壓力。問到是否覺得記者很可怕？他說：「又唔係，不過驚自己唔識答，影響到其他人。」