43歲生日　Victoria獲夏柏唱歌送飛吻

「碧咸嫂」Victoria Beckham昨日43歲生日，於社交網Instagram（IG）上載5歲大囡囡夏柏舒芬（Harper Seven）為她唱生日歌嘅短片，真係甜到入心！片中夏柏紮咗兩條賓辮、穿上白色裙仔，一邊撻住手指打拍子，一邊唱生日歌，最後唱到「Happy Birthday to Mummy」時仲對鏡頭送飛吻，真係Cute到爆，而Victoria亦簡單留言：「我愛你。」<br/><br/>至於結婚18年嘅老公碧咸就喺IG上載Victoria當年仲喺辣妹（Spice Girls）成員、拍《Say You'll Be There》MV的照片「贈慶」 。經常黑面嘅Victoria難得對鏡頭舉晒手笑到露齒，一身黑皮造型襯埋個髮型，頓時喜感十足，留言：「祝呢位出色嘅媽咪、老婆同朋友生日快樂，我們愛你，祝你度過美麗的一天。」真係萬萬都估唔到，當年碧咸就係睇咗呢個MV而對Victoria一見鐘情，認定對方就是「真命天女」，曾受訪公開話：「這就是我想要的女孩，我會將她追到手！她就是完美的化身，我知道如果她都喜歡我，我們會永遠在一起。」而兩個囝囝告斯（Cruz）同羅密歐（Romeo）亦分別在IG上載同媽咪嘅合照，賣口乖大讚Victoria是「最好的母親」，Victoria亦拍片騷洛杉磯大宅，晒雪櫃上面貼滿仔女祝佢生日嘅照片。雖然個個都好Sweet有晒表示，但唯獨大仔布魯克林（Brooklyn）就疑似因為去咗Coachella音樂節狂歡將Victoria生日拋諸腦後，目前為止喺IG咩聲氣都無，又缺席周日媽咪餐生日飯，只見一家五口在馬利布食日本菜，Victoria例牌黑面現身。<br/><br/>另外，辣妹成員Emma Bunton與Mel C亦有上載合照祝賀，不過暫時就唔見被離婚困擾嘅Mel B同Geri Horner有出聲。不過最搞笑莫過於Victoria現身洛杉磯機場時獲在場的狗仔隊大合唱送生日歌，Victoria亦有將片段擺上網，加晒哈哈笑emoji，話成班記者搞巡迴演出咁款。